Që nga 9 marsi e deri tani në vendin tonë janë shënuar 15 viktima dhe 259 të infektuar nga COVID-19, teksa gjatë 24 orëve të fundit janë kryer 152 teste, në mesin e të cilëve 16 kanë rezultuar pozitivë.
Sikundër është përmendur shpesh nga mjekët, kjo javë dhe java e ardhshme pritet të jenë vendimtare, ku kurba do arrijë pikun.
Këtë gjë e ka rikonfirmuar drejtoresha e Institutit të Shëndetit Publik, Silva Bino, e cila në një lidhje live me Report Tv është shprehur se tashmë kurba ka arritur pikun dhe se për momentin 4 persona janë në terapi intensive.
Mirëpo, theksoi se qytetarët duhet të jenë të kujdesshëm dhe të zbatojnë masat e marra nga qeveria.
Bino e vlerësoi si të ulët numrin e të prekurve në vendin tonë dhe kjo sipas saj ka ardhur për shkak të masave të marra nga qeveria.
“Ky është piku ynë pak a shumë. Po të marrim edhe periudhën e inkubacionit të sëmundjes në këtë periudhë me masën e karantinës, distancimin social e kemi marrë më herët, prandaj numri i rasteve nuk është aq i lartë. Kjo bazohet te numri i të dyshuarve dhe të cilëve që kërkojnë kujdes. Kemi disa persona në kujdes intensive, 4 janë në gjendje kritike, të shpresojmë që do të ketë përmirësime.”
Më herët ditën e sotme ministrja e Shëndetësisë Ogerta Manastirliu dha një deklaratë për mediat, ku foli edhe rreth përfitimit të ndihmës ekonomike, duke theksuar se aplikimi do të realizohet online ose përmes shërbimit postar.
Ajo gjithashtu sqaroi qytetarët se do përfitojnë dyfishim të masës së ndihmës ekonomike rreth 64 mijë familje.
Manastirliu: 64 mijë familje do të përfitojnë nga ndihma ekonomike. Ja si do bëhet shpërndarja
Ditën e sotme Shqipëria u fut në karantinë pa afat, pasi qeveria vendosi që të gjitha institucionet arsimore (përfshirë edhe çerdhet), do të qëndrojnë mbyllur deri në përfundimin e gjendjes së epidemisë të shkaktuar nga COVID-19.
Ndërkohë mësimi për të gjithë nxënësit vijon online, ndërsa ministrja Besa Shahini deklaroi dje se provimet e Maturës Shtetërore nuk do të shtyhen por maturantëve do t’u bëhet favorizim, duke mos u pyetur në provim lidhur me leksionet që kanë marrë që nga koha kur janë izoluar në shtëpi.
Po ashtu edhe klinikat dentare do të jenë të mbyllura pas 3 prillit kurse spitalet publike dhe jopublike nuk do lejojnë të kryejnë operacione kirurgjikale.
Nuk do të lejohen grumbullimet masive në ambientet të hapura dhe të mbylluar kurse Komisionet e vlerësimit të KEMP-it nuk funksionojnë por qytetarët që nuk kanë mundësi të paraqiten do të vijojnë të marrin pagën e paaftësisë për punë.
