Pas ngjarjes së rëndë në Korçë ku një 50-vjeçar ka mbytur me duar nënën e tij, me të cilën dhe jetonte prej vitesh, dalin detaje të reja.
Kujtojmë se viktima, Nazime Demollari, 80 vjeç u gjet e pajetë sot në banesën e saj në lagjen 14 në Korçë, e pranë trupit ka qëndruar deri sa ka ardhur policia edhe i biri, që për ironi të fatit kishte të njëjtin emër me nënën, por në gjininë mashkullore.
Nazim Demollari është gjetur nga policia pranë trupit të nënës në dhomën e gjumit, pak minuta pasi e kishte mbytur me duar.
Shkak për ngjarjen dyshohet se ka qenë sjellja e 50-vjeçarit i cili ishte një përdorues i rregullt i alkoolit. Në sherr e sipër, ai i ka futur duart në fyt nënës së tij duke i marrë jetën.
DËSHMITË
Fqinjët e familjes Demollari tregojnë se ishin në dijeni të problemeve të vazhdueshme të nënës me djalin. Nazim Demollari ishte divorcuar nga gruaja dhe që pas ndarjes jetonte me nënën e moshuar. I papunë dhe pa asnjë të ardhur, 50-vjeçari i ishte dorëzuar pijes dhe grindjet me nënën e tij ishin të paevitueshme.
Fqinjët kanë dëgjuar herë pas here debate mes tyre. Dyshimet se krimi mund të ketë ndodhur për çështje pronësie nuk janë pistë hetimi e policisë pasi familja ishte e varfër dhe nuk kishte prona. Aktualisht autori është shoqëruar nga policia por ende nuk është marrë në pyetje pasi ndodhet në gjendje shoku.
