Covid-19, virusi që ka ‘paralizuar’, frikësuar dhe ka ngritur shumë pikëpyetje në mendjet e njerëzve deri tani ka shënuar 166, 139 viktima, 2,428,714 të infektuar, teksa 637,000 persona janë shëruar.
Shumë pak dihet për të, që tashmë është përhapur kudo, madje ka ‘gjunjëzuar’ edhe kombet më të fuqishme në botë, ndërsa mjekët ende nuk kanë një ilaç në duart e tyre.
Deri tani bluzat e bardha kanë bërë kombinime medikamentesh, ose kanë përdorur antibiotikë, që kanë mundur ‘armikun’ në murtajat e mëparshme.
E teksa disa vende janë duke u përballur me balance tragjike të viktimave nga koronavirusi, vende të tjera janë duke kaluar një situatë më të mirë dhe kanë nisur lehtësimin e masave, mes tyre edhe Shqipëria.
Mirëpo, OBSH vijon të mendoj se lehtësimi i masave në këto momente nuk është një hap i duhur dhe duhet bërë me shumë kujdes.
Së fundmi, kreu i Organizatës Botërore të Shëndetësisë, Tedros Adhanom Ghebreyesus, ka thënë se vendet që kanë planifikuar të zbusin masat mbrojtëse në luftën kundër pandemisë së COVID-19, duhet të jenë të gatshme për një valë të dytë të koronavirusit.
Ghebreyesus theksoi gjithashtu në një konferencë për mediat se zbutja e masave kufizuese nuk do të thotë se ka marrë fund epidemia e COVID-19 në cilindo vend, “por thjesht ka filluar një fazë e re”.
“Është shumë e rëndësishme që në fazën tjetër, vendet të jenë më të edukuara, të angazhojnë dhe përgatisin qytetarët për të parandaluar dhe reaguar shpejt në rast të ndonjë vale të re të koronavirusit. Të sigurojnë kapacitete të mjaftueshme për kryerjen e testeve, të izolojnë dhe kujdesen për këdo që infektohet dhe të gjurmojnë kontaktet që mund t’i kenë pasur,” tha kreu i OBSH.
Kjo deklaratë pason një sërë deklaratsh të tjera nga OBSH, e cila disa ditë më parë deklaroi se pandemia do zgjasë shumë më shumë nga sa mendojmë ne dhe do na duhet të përballemi me një mënyrë të re jetese.
OBSH: Mbajtja e maskës do kthehet në normë, nuk e dimë kur koronavirusi do të zhduket
Sakaq, ditën e djeshme Mike Ryan, drejtori ekzekutiv i OBSH-së për emergjencat shëndetësore ka lajmëruar se deri më tani nuk janë gjetur shenja antitrupash në gjak, që të provojnë se të shëruarit nga pandemia kanë fituar imunitet ndaj koronavirusit.
