Gjykata e Posaçme kundër Korrupsionit dhe Krimit të Organizuar po zhvillon sot seancën për vlerësimin e masës së sigurisë ndaj Jonaid Myzyrit, kryetarit të Komisionit të Prokurimeve Publike, i cili po përballet me akuzën e “shkeljes së barazisë në tendera”, kryer në bashkëpunim.
SPAK e mori zyrtarisht të pandehur Myzyrin më 24 qershor, në kuadër të një hetimi mbi tenderin për mirëmbajtjen e aksit rrugor Shpal–Ura e Repsit me një gjatësi prej 58.7 kilometrash dhe vlerë 2.29 milionë euro.
Në këtë procedurë, sipas hetimeve, janë evidentuar shkelje të rënda të ligjit, për të cilat janë marrë të pandehur 11 persona, përfshirë drejtues dhe përfaqësues kompanish private.
Me kërkesë të SPAK, ndaj Myzyrit janë vendosur dy masa sigurie:
• Pezullimi nga detyra publike
• Detyrim për paraqitje pranë policisë gjyqësore
Të dyja masat do të shqyrtohen sot në seancë gjyqësore në prani të të pandehurit.
Sipas dosjes hetimore, Komisioni i Prokurimeve Publike, nën drejtimin e Myzyrit, ka injoruar parregullsitë ligjore të konstatuara në procedurën e prokurimit dhe ka favorizuar në mënyrë të paligjshme bashkimin e operatorëve ekonomikë AEK Munella dhe DRINI-1, duke mos penalizuar përdorimin e dokumenteve të falsifikuara në tender.
Veprimet e paligjshme janë bërë objekt hetimi nga prokurori Elvin Gogaj, ndërkohë që janë nën verifikim 90 procedura të tjera tenderimi, të zhvilluara që nga viti 2019.
Në listën e personave të pandehur për këtë çështje përfshihen:
1. Jonaid Myzyri – kryetar i KPP-së
2. Vilma Zhupaj
3. Lindita Skeja
4. Merita Zeqaj
5. Enkelejda Bega
6. Vladimir Hodaj
7. Marjana Hasani
8. Mehdi Lala – përfaqësues i kompanisë “Mela”
9. Ardian Kaza – ish-administrator i “AEK Munella”
10. Ndoc Kulla – përfaqësues i kompanisë “Jubica”
11. Gerald Adhiaj
Tre të fundit janë marrë të pandehur për falsifikim dokumentesh, ndërsa pjesa tjetër akuzohet për shkelje të barazisë në tendera në bashkëpunim.
Jonaid Myzyri u emërua në krye të Komisionit të Prokurimeve Publike në vitin 2020, për një mandat 5-vjeçar me propozim të Këshillit të Ministrave dhe votim në Kuvend. Në janar 2025, Kuvendi shpalli garën për drejtuesin e ri të KPP-së, ndërsa Myzyri ishte një nga dy kandidatët finalë, së bashku me Kreshnik Tërnovën.
Hetimi ndaj tij rrezikon të komprometojë besueshmërinë e institucionit që mbikëqyr konkurrencën e ndershme në tenderat publikë, një fushë e ndjeshme për korrupsion dhe shpërdorim fondesh publike.
