Nuk ka marrëveshje mes VV(Lëvizja Vetëvendosje) dhe LDK (Lidhja Demokratike e Kosovës)
Lajmi është bërë i ditur nga kreu i VV-së Albin Kurti përmes një video-mesazhi në profilin e tij në Facebook.
“Oferta ime e parmbrëmshme e datës 23 dhjetor 2019 u refuzua dje. Ajo kishte tri pika dhe afatin deri në mesnatën e mbrëmshme. Dihet se VV si parti e parë i takon kryetari i Kuvendit dhe nënkryetari i parë, LDK i takon nënkryetari i dytë. Le të bëjmë rokadën midis kryeparlamentarit dhe nënkryetarit të dytë dhe kësisoj LDK e ka kryeparlamentarin dhe VV i ka dy nënkryetarët e Kuvendit”, tha ai.
Sipas propozimit të Kurtit çështja e postit të presidentit mund të shtyhet për më vonë, por nëse LDK insiston për marrjen e këtij posti, atëherë Lëvizjes Vetëvendosje duhet t’i shtohet Ministria e Punëve të Brendshme.
“Nominimi i LDK-së për kandidatin për president bëhet pasi të mos kemi gjetur një personalitet konsensual jashtë partiak, kurse të përcaktohet LDK-ja për emrin e tij ose të saj, do të kërkohet edhe pëlqimi i VV-së.”
Po ashtu, ai ka folur për kërkesën e LDK që Ministria e Kulturëa, Rinisë dhe Sporteve të ndahet mes Ministrisë së Arsimit dhe Ministrisë së Shëndetësisë.
“Pakicat jo serbe e marrin Ministrinë e Zhvillimit Rajonal ose të Pushtetit Lokal, kurse pakicat serbe Ministrinë për Komunitete.
Programi im qeverisë është 50 për qind nga ai i LDK-së, zëvendëskryeministri i parë do të jetë nga radhët e LDK-së, pesë ministri në qeveri do të jenë të LDK-së, e cila edhe zgjodhi si të përzgjidhen ato, pasi që insistonte që medoemos të zgjidhte e para”, ka thënë Kurti.
Kurti nënvizon se më shumë se kaq VV nuk mund të ofrojë.
“Përtej kësaj ndryshe nuk mundemi, nuk duam dhe s’kemi ku shkojmë. Duam ta ndajmë përgjegjësinë qeverisëse me drejtësi e bujari duke lëshuar pe edhe pse fitues”.
Në fund e ka mbyllur duke thënë se kjo pritje po e dëmton shtetin e Kosovës, por nuk ka zgjedhje tjetër.
