Komisionerja europiane për çështjet e Brendshme, Ylva Johansson ka folur në një konferencë pas takimit me krerët e politikës shqiptare. Ajo ka thënë se Shqipëria ka bërë arritje në çështjet e drejtësisë dhe punët e brendshme prandaj u hapën edhe negociatat.
“Është kënaqësi për mua që jam në Tiranë me ftesën që më ishte bërë dhe vërtetë kënaqësi që patëm një diskutim të hapur e të sinqertë me kryeministrin Rama. Folëm për shumë gjëra sigurisht, por një nga mesazhet kryesore që kam dhënë këtu është që të përgëzoj të gjithë Shqipërinë për arritjet, në veçanti gjatë vitit të fundit dhe jo vetëm në fushën e këtij mandati që mbuloj unë për çështjet e drejtësisë dhe punët e brendshme, për sigurinë dhe migracionin. Ecuria dhe progresi i Shqipërisë gjatë vitit të fundit, shumë i mirë dhe ndaj u vendos të hapen negociatat dhe në dhjetor ne pamë që u përmbushën të gjitha kushtet për konferencën e parë ndërqeveritare”, ka thënë Johansson.
Komisionerja nuk humbi rastin të flasë edhe për zgjedghjet e 25 prillit, duke thënë se të gjitha partitë duhet të mbajnë përgjegjësi për integritetin e kandidatëve që përfshijnë në lista.
“Shqipëria po i afrohet zgjedhjeve dhe të gjitha partitë duhet të marrin përgjegjësitë që të kenë integritet të kandidatëve në lista. Ky ka qenë një takim vërtetë shumë i mirë dhe jam këtu për t’iu uruar për këtë progres por sigurisht që akoma më shumë duhet bërë”, tha Johansson.
