Kreu i Partisë Demokratike ka dalë në një reagim për mediat, pasi kryeministri Edi Rama deklaroi sot emergjencën në furnizimin me energji elektrike. Basha tha se kjo nuk është krizë energjetike, por krizë e shkaktuar nga korrupsioni dhe keqmenaxhimi me shkak dhe plan.
Ai shtoi se OSHE dhe KESH janë ndërmarrje të zhytura në korrupsion dhe tregoi se si energjia shitet më lirë në verë dhe më vonë blihet 3-4 herë më shtrenjtë me tendera korruptivë. (Lexo këtu)
“Kjo nuk është një krizë energjetike, por krizë korrupsioni dhe keqmenaxhimi me shkak dhe plan. I keni bilancet e operatorëve të energjisë se si në verë shesin me çmim të ulët energjinë e prodhuar nga uji dhe e blejnë e 3-4-fish çmimin pak muaj më vonë me tendera korruptivë duke shpërdoruar taksat që ua mbledhin kacidhe më kacidhe. OSHE dhe KESH janë ndërmarrje të zhytura në korrupsion dhe klientelizëm. Janë grup patronazhistësh dhe militantësh partie që nuk i shërbejnë interesit të qytetarëve”, tha Basha.
Ndër të tjera, Basha tha se nuk mund të bëhet paralelizëm me vendet e tjera dhe i quajti deklaratat e Ramës teatër për të dezinformuar opinionin publik, me idenë se rritja e çmimit të energjisë elektrike është e pashmanshme.
