Drejtuesi politik i PD-së për Tiranën, Belind Këlliçi, ka deklaruar se përplasja brenda mazhorancës është reale dhe se SPAK po përdoret si mjet politik nga kryeministri Edi Rama për të goditur kundërshtarët e tij të brendshëm.
Në një intervistë për Syri TV, Këlliçi tha se lufta mes kryeministrisë dhe Bashkisë Tiranë është e hapur dhe po ndodh në sfondin e hetimeve për aferat korruptive.
Sipas Këlliçit, Rama ka si qëllim zvogëlimin e ndikimit të Veliajt për ta eliminuar politikisht me kosto sa më të ulët për veten.
Ai shtoi se SPAK nuk po vepron si organ i pavarur drejtësie, por si një vegël në duart e kryeministrit, duke goditur vetëm opozitën dhe duke anashkaluar rastet e korrupsionit në qeveri.
“SPAK ka treguar se nuk është kampioni i luftës kundër korrupsionit, por një aktor politik që vepron sipas porosive të Ramës.
Afera e inceneratorëve dhe të ashtuquajturit ‘5D’ janë provë e qartë e standardit të dyfishtë që SPAK përdor për të mbrojtur të korruptuarit në pushtet,” u shpreh Këlliçi.
Ai vuri në dukje se Veliaj po përpiqet të mbrohet duke sinjalizuar me deklarata kundër Ramës, ndërkohë që qëndrimet e tij përfshijnë më shumë akuza ndaj opozitës. Këlliçi shtoi se fushata e 2023-ës ka qenë një përpjekje e shtabit të Veliajt për të marrë kontrollin politik dhe për të bërë hapin drejt qeverisjes qendrore.
“Në këtë luftë mes ‘Kodrës së Diellit’ dhe ‘Surrelit’, Rama ka treguar se është një makiavelist i cili përdor çdo mjet për të ruajtur kontrollin, ndërsa SPAK është thjesht një instrument i tij për të goditur prenë e radhës,” përfundoi Këlliçi.
