Policia e Korçës ka kapur në flagrancë katër të rinj teksa po gërmonin në Varret Monumentale Ilire të Selcës së Poshtme, në zonën e Mokrës.
Sipas informacionit zyrtar, të rinjtë u konstatuan nga inspektori i policisë së zonës, i cili ishte vënë në dijeni përmes informacionit operativ nga banorë të fshatit. Banorët kishin njoftuar se disa persona ishin parë duke përdorur detektorë metalesh dhe duke hapur gropa në pjesën anësore të territorit arkeologjik.
Burime nga policia bëjnë me dije se katër të rinjtë janë banorë të zonës së Korçës. Me ta po kryhen veprimet e para hetimore në terren, ndërsa më pas pritet të shoqërohen në komisariat për procedurat e mëtejshme ligjore.
Kjo është hera e parë që policia arrin të kapë në flagrancë persona që gërmojnë për metale apo objekte arkeologjike me vlerë në Varret Ilire të Selcës. Megjithatë, gjatë një periudhe 2 deri në 3 mujore, janë konstatuar edhe tre raste të tjera gërmimesh të paligjshme, por autorët nuk janë identifikuar.
Varret Ilire të Selcës i përkasin fundit të shekullit IV para Krishtit dhe konsiderohen unike për nga tipologjia e tyre në shkallë evropiane. Ato janë shpallur zonë arkeologjike e kategorisë A, por pavarësisht këtij statusi, hyrja e personave të paautorizuar mbetet e lehtë, pasi territori nuk është i rrethuar apo i mbrojtur fizikisht nga institucionet përkatëse.
Ndërtimi i rrugës së re Qukës Qafë Plloçë, e cila kalon shumë pranë sitit arkeologjik, ka rritur edhe më tej aksesin në zonë. Kjo ka bërë që Varret Ilire të Selcës të kthehen gjithnjë e më shumë në shënjestër të personave që kërkojnë thesare apo objekte me vlerë historike.
