Dita e djeshme, kishte në fokus kaosin e ndodhur dje në Rinas. Çështja e protestës së kontrollorëve të trafikut ajror që solli dhe pezullimin e fluturimeve ka marrë vëmendjen kryesore të opinionit publik dhe politikës.
Kryeministri Edi Rama është pyetur dhe ngacmuar për këtë çështje dhe nga komentuesit e ndjekësit e tij në rrjetet sociale. Teksa poston foto nga turi i tij në Tepelenë, një komentues i shkruan kryeministrit se duhet të ishte në Rinas dhe se shteti ka rënë, ndaj nuk ka kuptim që vazhdon fushatën. Nga ana tjetër Rama i sugjeron të rrijë dhe të shohë.
Komentuesi: “Tani duhet të ishe në Rinas jo në Tepelenë, shteti ka rënë s’ka kuptim që vazhdon fushatën dhe nuk merr masa për këtë që ndodhi, është rënia e shtetit”.
Edi Rama: “Mos qa hallin e shtetit ti, se nuk bie shteti jo! Rri e shiko!”
Kryeministri Rama reagoi dhe gjatë ditës së djeshme për këtë situatë, ku akuzoi Ilir Metën dhe Sali Berishën për përfshirje, si dhe kërcënoi me burg kontrollorët e ngritur në protestë, pasi po kryenin vepër penale.
Sot pas mesnate, disa kontrollorët që ishin në një hotel pranë aeroportit, janë arrestuar nga Policia dhe janë shoqëruar në rajon. Menaxheri i hotelit tha për mediat se nuk kishte parë ndonjëherë arrestim të tillë dhe për një moment, iu duk sikur po arrestonin Bin Ladenin.
