Ditën e sotme kreu i Grupit Parlamentar të PS-së, Blendi Çuçi deklaroi seancës plenare, se komisionet hetimore janë një e drejtë kushtetuese e opozitës, por sipas tij, mazhoranca kundërshton objektin.
“Sot praktikisht kishim për shqyrtim 6 nga nismat ligjore që kishte propozuar opozita dhe ju e patë që edhe për shqyrtimin e nismave të tyre ata përsëritën skenat. Qëllimi është të diskutohej dhe jo miratimi. Ne japim arsyet tona pse nuk duhet të miratohen. E kemi thënë që është e drejtë kushtetuese që ata të ngrenë komisione hetimore. E vetmja gjë është që ka të bëjë me objektet. Po të jetë brenda kërkesave që ka Kushtetuta, pa diskutim”, u shpreh Çuçi.
Gjatë fjalës së tij Çuçi theksoi se sjellja e deputetëve të opozitës është një demagogji pasi rrëmujë ndodh edhe kur në seancë po diskutohen projektligjet e propozuara nga deputetët e opozitës.
“Tymueset dhe barrikadat janë skenar i opozitës. Do vazhdojmë të miratojmë ligje, të qeverisim. Debati parlamentar nuk është vetëm seancë planer është edhe më i gjerë në komisione. Po opozitë? Me forcë nuk i marrim t’i fusim në komisione. Skenari ynë është të miratojmë ligjet. Nuk i ndezim ne flakadanët, nuk e bllokojmë ne foltoren, nuk heqim ne me dhunë. Për të penguar punën për arsye që nuk lidhen me parlamentin, por lidhet vetëm me një njeri që është në SPAK. Kjo është çështje e opozitës, jo e jona”, u shpreh Çuçi.
