Një kandidat për presidencën e Kolumbisë u qëllua me tre plumba gjatë një tubimi në kryeqytetin Bogota, dy prej tyre në kokë.
Ngjarja ndodhi të shtunën, teksa Miguel Uribe Turbay po fliste para një grupi të vogël njerëzish në një park.
Një i dyshuar 15-vjeçar u arrestua menjëherë në vendngjarje, sipas mediave lokale.
Gruaja e kandidatit, Maria Claudia Tarazona, bëri thirrje për lutje dhe mbështetje për burrin e saj 39-vjeçar, i cili aktualisht po lufton për jetën. Ajo kërkoi që Zoti të udhëheqë duart e mjekëve që po e trajtojnë.
Partia Centro Democrático, ku bën pjesë Uribe, dënoi sulmin, duke e cilësuar atë si një kërcënim ndaj demokracisë dhe lirisë në Kolumbi.
Pamjet e kapura me telefon tregojnë momentin kur Uribe u qëllua ndërsa po fliste, duke shkaktuar panik te të pranishmit.
Sipas raportimeve, ai u plagos në gju dhe dy herë në kokë. Pas plagosjes, ai u transportua me helikopter në klinikën Santa Fe, ku mbështetësit janë mbledhur jashtë për ta mbështetur.
Qeveria e presidentit Gustavo Petro dënoi fuqishëm sulmin, duke e cilësuar atë si një akt dhune kundër individit dhe demokracisë. Sekretari i Shtetit të SHBA-së, Marco Rubio, gjithashtu dënoi të shtënat, duke i konsideruar ato një kërcënim të drejtpërdrejtë për demokracinë.
Miguel Uribe Turbay njoftoi kandidaturën e tij për zgjedhjet presidenciale të vitit të ardhshëm në tetor. Ai vjen nga një familje me ndikim të madh politik në Kolumbi.
Babai i tij ishte një biznesmen dhe udhëheqës sindikate, ndërsa nëna e tij, Diana Turbay, ishte një gazetare e njohur që u vra në vitin 1991 gjatë një operacioni për ta shpëtuar, pas rrëmbimit nga karteli i drogës Medellin, i drejtuar atëherë nga Pablo Escobar.
