Ditën e sotme Gjykata e Krimeve të Rënda ka vendosur gjykim të shkurtuar për ish-ministrin e Brendshëm Saimir Tahiri.
Ky i fundit është paraqitur te Krimet e Rënda disa herë, por edhe herën e fundit pasi u shty seanca, Tahiri i ironizoi me një foto nga aplikacioni “FaceApp”.
Më 10 shtator do të jepet edhe pretenca për Tahirin. Ky i fundit e ka quajtur absurd faktin që gjyqi ndaj tij është shtyrë për herë të katërt.
Ish-ministri i Brendshëm ka dalë i nervozuar para kamerave ku ka thënë se ky process po zgjatet përtej çdo limiti, por sërish ka ironizuar duke u shprehur se shyqyr që janë gjetur dokumentet dhe që i kanë përkthyer.
“Shyqyr që u gjetën dokumentet. Çfarë të bëj, t’i uroj që më në fund jo i gjetën, por i përkthyen. Merreni me mend çfarë bëjnë me njerëzit. Maksimumi në shkollë kam marrë 20% për mungesat, s’kam ngelur ndonjëherë në vjeshtë. Kjo histori ka nisur me burra me mustaqe dhe është mbyllur me burra që bëjnë botoks. Por ky s’është rasti im.
U bënë dy vite besoj se dhe shtyrja e sotme është e tepërt. Me pretendimin se është para gushtit dhe gushti është pushim dhe akoma më e tepërt. Tani është shtyrë për në shtator. Nuk u lodhët me 2 vite që e ndiqni këtë histori?
Jam i gatshëm ta mbroj veten çdo ditë, çdo orë, çdo sekondë. Më duket e tepërt. U shty herën e parë për çështje poste, polici, shtyrje letrash dhe herën e katërt se gushti është pushim. Prokuroria duhet ta ndajë mendjen, ose të dënojë një kriminel ose të lërë të qetë një njëri të pafajshëm”, tha Tahiri para gazetarëve.
