Ditën e sotme mijëra fëmijë iu drejtuan bankave të shkollës, për të nisur vitin e ri mësimor.
Mirëpo një 12-vjeçare nga fshati Luftinjë i Tepelenës. nuk do të shkojë në shkollë, pasi për dy vite me radhë është abuzuar seksualisht nga mësuesi 64, vjeçar, M.Dida, shkruan “Newsbomb”.
Prindërit e të miturës pretendojnë se vajza e tyre ka nevojë për një psikolog.
“Jo vetëm e madhja, por as vajza e vogël 7-vjeçe nuk pranoi të shkonte në klasën e dytë. Ajo ka kuptuar gjithçka dhe qan vazhdimisht. Vajzat e mia kanë nevojë për psikolog. Janë të traumatizuara”, shprehet nëna e 12- vjeçares së përdhunuar, Arta Muçodemi.
Më pas ajo tha se është e lodhur nga seria e gjyqeve në Tepelenë, që sot vazhdojnë në Apelin e Gjirokastrës.
Kjo pasi Gjykata e Tepelenës e la të lirë mësuesin vetëm 72 orë pas arrestimit.
Prindërit duan varjen e mësuesit para syve të të gjithëve, por duke qenë se kjo nuk është e mundur kërkojnë që ai të burgoset.
Ata kanë dëgjuar çdo detaj nga vajza e tyre, për abuzimet sistematike të 64-vjeçarit.
Ishte një telefonatë anonime që i vuri prindërit në dijeni se çfarë po ndodhte.
“Më morën në telefon e më thanë që mësuesi po më përdhunonte vajzën. E thirrëm vajzën, e pyetëm, ajo nisi të qante. Pastaj na tregoi me detaje gjithçka. Ai (mësuesi) nxirrte nxënesin e tjerë nga klasa, dhe vajzën time e mbante për ta përdhunuar. E kishte bërë këtë për dy vite por ne e zbuluam vetëm më 2 qershor të 2018-ës. Më 5 qershor kemi bërë denoncimin në Tepelenë dhe vajza ka rrëfyer abuzimet për oficerin e policisë në prani të një psikologeje”, rrëfen më tej nëna e vajzës.
Për ta situata është bërë e papërballueshme dhe kërkojnë ndihmën e shtetit për t’i mundësuar një psikolog.
Arta dhe bashkëshorti janë të dy të papunë dhe të ardhurat e vetme, janë pensioni id y të moshuarve që kanë në shtëpi.
Ata duan të zhvendosen në Tiranë, në mënyrë që vajzën e tyre të mos e ndjekë makthi.
“Ne duam që vajzat të shkojnë në shkollë si gjithë fëmijët e tjerë. Historinë e së madhes po e vuan edhe e vogla. Po presim ç’do vendosë gjykata e Apelit në seancën e 23 shtatorit. Ai (mësuesi) ka lekë. Ne s’kemi asgjë ndaj i bëjmë thirrje shtetit të verë dorë”, përmbyll Arta.
Mësuesi ndërkohë ka hedhur poshtë të gjithë akuzat e bëra ndaj tij nga prindërit e vajzës.
