Italia vazhdon betejën e saj kundër koronavirusit.
Gjatë 24 orëve të fundit janë regjistruar 130 të vdekur nga 156 që u raportuan dje, duke e çuar numrin e përgjithshëm në 32,626.
Gjithashtu janë verifikuar 652 raste pozitive, duke pësuar një rritje të lehtë nga dita e djeshme kur u raportuan 642 dhe tashmë numërohen 228,658 të infektuar që nga nisja e pandemisë deri më sot.
Numri i personave aktiv të infektuar është 59,322, 8,947 prej tyre po kurohen në struktura spitalore dhe 595 në repartet e terapisë intesive.
Sot janë shëruar 2,160 persona dhe numri i tyre i përgjithshëm deri më sot është 136,720.
Në rajonin e Lombardisë janë 57 viktima më shumë se një ditë më parë dhe numri i tyre ka arritur në 15,784 dhe 86,334 janë të infektuar nga Covid 19 në këtë territor.
Kryeministri italian, Giuseppe Conte deklaroi dje në Parlamentin italian se vendi e ka tejkaluar fazën më të keqe të krizës së koronavirusit.
“Nëse më të keqen e kemi larguar, ia kemi borxh qytetarëve, të cilët ata kanë ndryshuar stilin e jetës së tyre”, theksoi Conte.
Megjithatë, Conte kritikoi gjithashtu sjelljen e disa të rinjve të cilët grumbullohen netëve në disa qytete, duke theksuar se “nuk është koha për pushime” dhe bëri thirrje për publikun që të bëjnë pushimet në Itali, duke ndihmuar kështu turizmin në krizë.
Më herët, qeveria italiane ka njoftuar se do të rihapë kufijtë e saj për turistët nga Bashkimi Europian duke filluar nga 3 qershori, si edhe do të anulohet karantina për ata që hyjnë në territorin italian.
