Parlamenti iraken i kërkoi qeverisë ditën e djeshme, të largojë 5200 trupat amerikanë që ndodhen në vend.
Shkak u bë sulmi me dron , nga ku mbeti i vrarë gjenerali i lartë iranian, Qasem Soleimani, një komandat iraken dhe 8 ushtarë.
Shumica Shiite në parlament, votoi pro rezolutës që detyron trupat amerikane të tërhiqen.
“Qeveria e kryeministrit Adil Abdul-Mahdi duhet “të punojë për t’i dhënë fund pranisë të të gjitha trupave huaj në tokën irakiane dhe t’i ndalojë ata të përdorin tokën, hapësirën ajrore ose ujin për çdo arsye”, thuhej në rezolutë.
Kreu i parlamentit, Mohamed al-Halbousi, bëri me dije, se marrëveshja nuk mund të përfundojë përpara një viti.
Nga ana tjetër, sekretari i shtetit, Mike Pompeo, tha për “Fox News”, se ka besim se populli iraken ka dëshirë, që trupat amerikane të qëndrojnë.
Në lidhje me këtë lëvizje të parlamentit iraken, ka reaguar edhe presidenti i SHBA-ve, Donald Trump.
Ky i fundit ka kërcënuar Irakun me sanksione të rënda, nëse miratohet rezoluta për dëbimin e trupave amerikanë.
Gjithashtu Trump është shprehur, se nëse Irani ose Iraku reagojnë për vrasjen e Soleimanit, SHBA do të jetë shumë e ashpër.
“Nëse do të dëboni trupat amerikanë nga Iraku, atëhere do t’iu vendosim sanksione si kurrë më parë’’- është shprehur Donald Trump.
Kujtojmë këtu se Washingtoni dhe Baghdadi ranë dakort 4 vite më parë, për rikthimin e trupave amerikane, për t’i ndihmuar në luftën kundër ISIS.
Koalicioni i drejtuar nga SHBA-të, njoftoi se për momentin është tërhequr nga lufta ndaj ISIS dhe po ruan bazat , pas rritjes së tensioneve me Iranin.
Marrëdhëniet mes Iranit dhe SHBA-së, u tensionuan pas vrasjes së gjeneralit të lartë, Qasem Soleimani.
Ky i fundit kishte shtrirë ndikimin në të gjithë rajonin dhe kishte sulmuar disa herë bazat ushtarake amerikane.
