Pak ditë më parë, Edi Rama, Aleksandar Vuçiç dhe Zoran Zaev firmosën marrëveshjen mes tri shteteve, për interesa të ndryshme mes tri palëve. Kjo marrëveshje, u quajt “Ballkani i Hapur”. Nga kjo marrëveshje, ka ndikim direkt import-eksporti.
Sipas të dhënave nga INSTAT, Shqipëria kryen rreth 10% të shkëmbimeve tregtare me rajonin dhe partner kryesor ka Kosovën me 220 milionë euro eksporte në vit. Një bilanc pozitiv, me 164 milionë euro më shumë. Ndërsa nga Serbia, Shqipëria më shumë mall dhe bilanci është negativ, me 134 milionë euro më pak.
Raportet e afërta dhe një sërë marrëveshjesh mes qeverive Shqipëri-Kosovë kanë sjellë avantazhe ekonomike që pasqyrohen edhe në shifra me materialet e ndërtimit, metalet, lëndët djegëse e ushqime që shkëmbejmë. Nga ana tjetër, Serbia sjell në Shqipëri ushqime, pije duhan, minerale, materiale ndërtimi e metale.
Ndërkohë, me Maqedoninë e Veriut, import-eksportet janë në balancë. Pakti i mini-Shengenit me Maqedoninë e Veriut dhe Serbinë pritet të sjellë ndryshime në hartën e import-eksporteve, duke krijuar disavantazhe për Kosovën e cila nuk pranon të bëhet palë.
Për strategjinë e Ballkanit të Hapur, tri shtetet kanë bërë marrëveshje për lehtësimin e import-eksportit të mallrave, qarkullimin e lirë në tregun e punës dhe ndihmës së shpejtë në raste se ndodhin fatkeqësi natyrore.
