Një 54-vjeçar shqiptar i dënuar për mashtrim, është ekstraduar ditën e sotme nga Gjermania.
Sipas njoftimi të policisë, bëhet fjalë për shtetasin Ilir Demolli.
Ky i fundit u arrestua më 5 mars të këtij vitin nga policia e Mynihut.
Ndërkohë Gjykata e Tiranës e ka dënuar Demollin me 7 vjet burg për veprën penale të mashtrimit.
Duke u hequr si drejtori i një banke private, ai i ka marrë një shtetaseje në 2012-ën, një shumë prej 230 mijë eurosh.
Nga kjo shumë ai i ka kthyer të dëmtuarës vetëm 25 mijë euro.
Njoftimi i policisë
Nga Specialistët e Interpol Tirana, u bë ekstradimi nga Gjermania drejt Shqipërisë, i shtetasit shqiptar Ilir Demolli, 54 vjeç. Ky shtetas është arrestuar nga autoritetet policore në Mynih, më datë 05.03.2019, me qëllim ekstradimin drejt Shqipërisë, në zbatim të urdhër-arrestit ndërkombëtar të nxjerrë nga Zyra Qendrore Kombëtare Interpol Tirana, pasi Gjykata e Rrethit Gjyqësor Tiranë, e ka dënuar këtë shtetas me 7 vjet burg, për veprën penale “Mashtrimi”. Ky shtetas, në vitin 2012, i kishte marrë me anë të mashtrimit shtetases F.SH., një shumë prej 230 000 eurosh, duke ju prezantuar si drejtor i një banke private. Nga kjo shumë, ky shtetas i ka kthyer të dëmtuarës vetëm shumën 25 000 euro.
