Një kurorë lulesh, simbol i një mesazhi kërcënues, është vendosur në derën e banesës së prindërve të Emiljano Nikës, drejtor i IKMT-së në Shkodër.
Ngjarja ka ndodhur në fshatin Sektor të Velipojës dhe është raportuar menjëherë në polici si një akt intimidimi.
Emiljano Nika ka pasur rol kyç në aksionin për prishjen e ndërtimeve pa leje në zonën e mbrojtur të Thethit, ku është përballur me rezistencë dhe kundërshtime nga banorët lokalë.
Ai është kërcënuar edhe më parë për shkak të detyrës që ushtron. Aktualisht, policia po vijon hetimet për të zbuluar autorët e këtij akti dhe për të siguruar mbrojtjen e Nikës dhe familjes së tij.
Njoftimi i Policisë:
Më datë 18.07.2025, shtetasi E. N., 44 vjeç, banues në Shkodër, ka kallëzuar se në banesën ku jetojnë vetëm prindërit e tij, në fshatin Sektor, Velipojë, në pjesën e jashtme të banesës, mbi kangjellat e portës, ka konstatuar një kurorë me lule. Po punohet për sqarimin e rrethanave të rastit, identifikimin dhe kapjen e autorit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme. Nika është kërcënuar edhe më herët për shkak të detyrës. Policia po heton për të identifikuar autorët dhe për të garantuar sigurinë e tij.
