Policia ka nisur hetime për Enedjo Kaçi, i cili dyshohet se ka qenë shënjestra e atentatit të ndodhur më 22 shkurt në Kamëz.
Hetimi është hapur për moskallëzim krimi, pasi Kaçi arriti të shpëtonte nga sulmi me armë. Ndërkohë, dy të kërkuarit, Fabion Kurti dhe Dejvi Mullai, janë autorët që qëlluan me armë.
Sipas policisë, specialistët e Hetimit të Krimeve të Komisariatit të Policisë Nr. 5 kanë referuar materialet në Prokurori, duke nisur procedimin në gjendje të lirë për Kaçin, i cili është 30 vjeç, për veprën penale “Moskallëzim krimi” lidhur me ngjarjen e ndodhur në Kamëz më 22 shkurt 2025.
Dy autorët e dyshuar, Dejvi Mullai dhe Fabion Kurti, lëviznin me një makinë tip “BMW”, ndërsa shënjestra dhe persona të tjerë që ende nuk janë identifikuar, udhëtonin me një “Land Rover”.
Mullai dhe Kurti janë të njohur për aktivitetin e mëparshëm të shpërndarjes së lëndëve narkotike, ndërsa Kaçi nuk ka precedentë penalë. Dyshohet se atentati mund të ketë pasur lidhje me një konflikt të mëparshëm mes të rinjve për trafikim lëndësh narkotike.
