Vasile Frumuzache, 32-vjeçari i arrestuar për vrasjen e Denisa Maria Adas dhe i dyshuar për një tjetër krim të rëndë ndaj Ana Maria Andrei, është sulmuar brenda qelisë së tij në burgun e Pratos, në Itali.
Sipas autoriteteve, agresioni ka ndodhur nga një tjetër i dënuar, një i afërm i viktimës së dytë, i cili i ka hedhur vaj të valë në fytyrë, duke i shkaktuar djegie të shkallës së parë dhe të dytë.
Frumuzache është dërguar menjëherë në spital për trajtim mjekësor.
Ngjarja është cilësuar “jashtëzakonisht serioze” nga prokurori i Pratos, Luca Tescaroli, i cili ka kritikuar mungesën e kontrollit në ambientet e sigurisë së burgut.
“Askush, pavarësisht krimeve që mund të ketë kryer, nuk duhet të përjetojë dhunë jashtë ligjit. Çdo individ ka të drejtë të trajtohet me dinjitet,” theksoi ai.
Ndërkohë, hetimet ndaj Frumuzachet vazhdojnë. Në banesën e tij në Monsummano Terme (në krahinën e Pistoias), hetuesit kanë zbuluar prova të reja që mund të lidhin të dyshuarin me vrasje të tjera ende të pazbardhura.
Autoritetet nuk përjashtojnë mundësinë që ai të jetë i përfshirë në një seri më të gjerë krimesh.
Të shtunën pritet të mbahet seanca për konfirmimin e urdhër-arrestit ndaj Frumuzachet, i cili akuzohet për vrasje të rëndë dhe fshehje kufome.
