Prokuroria pranë Gjykatës së Shkallës së Parë të Juridiksionit të Përgjithshëm në Tiranë ka vendosur sekuestrimin e disa pasurive të lidhura me shtetasin A.Ll., i dënuar më parë në Mbretërinë e Bashkuar për veprën penale të “prodhimit dhe shitjes së lëndëve narkotike”, parashikuar nga neni 283 i Kodit Penal shqiptar.
Hetimet e zhvilluara në kuadër të procedimit pasuror nr. 04, datë 22.05.2025, kanë treguar se A.Ll. ka përfituar të ardhura që nuk justifikohen me burime të ligjshme dhe që dyshohet se rrjedhin nga aktiviteti i tij kriminal në fushën e narkotikëve.
Nisur nga këto të dhëna, prokuroria ka kërkuar vendosjen e sekuestros preventive mbi një sërë pasurish që figurojnë në emër të të afërmve të tij, duke i konsideruar ato si pjesë të një pasurie të ndërtuar në mënyrë të paligjshme.
Ndër pasuritë e sekuestruara përfshihen:
• Një pasuri e paluajtshme me numër pasurie 416/118, e përbërë nga 403.1 m² truall dhe një godinë me sipërfaqe ndërtimi prej 275.2 m² (2 kate, bodrum dhe papafingo), në bashkëpronësi ½, regjistruar më 24.03.2021 në emër të babait të subjektit, B.Ll.
• Dy automjete: një mjet tip Opel Corsa dhe një Jeep Grand Cherokee, që dyshohet se janë blerë me të ardhura të përfituara nga aktiviteti kriminal.
• Një subjekt tregtar me emrin Auto Lleshi, me NUIS L52116150G, që ushtron aktivitet në fushën e riparimit të automjeteve, tregtimit të pjesëve të reja dhe të përdorura, si dhe në blerjen dhe shitjen e automjeteve të importuara. Ky biznes është regjistruar në emër të vëllait të A.Ll.
Sipas organit të akuzës, të gjitha këto pasuri janë të dyshuara si të përfituara nga veprimtaria kriminale dhe si të tilla, janë vënë në sekuestro me qëllim konfiskimin e mundshëm në vijim të procesit gjyqësor.
