Ish-drejtori i “Emporiki Bank”, Artan Nisllaj, mësohet se është arrestuar nga policia ditën e sotme.
Bëhet me dije se Nisllaj ishte shpallur në kërkim, pasi në vitin 2015 është shpallur fajtor dhe është dënuar me 18 muaj burg.
Ish-drejtuesi i Emporiki Bank” ka tentuar që të pastrojë veten e tij nga akuzat në tre shkallë të sistemit gjyqësor, por në fund ai ka dështuar.
Njoftimi i Policisë:
“Në vijim të punës për kapjen e personave të shpallur në kërkim, nga strukturat e DVP Tiranë u bë kapja dhe ndalimi i shtetasit Artan Nisllaj, 41 vjeç, banues në Tiranë, pasi Gjykata e Apelit Gjirokastër e ka dënuar me 18 muaj burg, për veprën penale “Vjedhja duke shpërdoruar detyrën”.
Materialet procedurale i kaluan Prokurorisë pranë Gjykatës së Shkallës së Parë Tiranë”, ka njoftuar Policia.
Historiku
Gjithashtu mësohet se në vitin 2014 Gjykata e Rrethit Gjyqësor Gjirokastër, me vendimin nr.54/21-2014-204, ka vendosur: “Deklarimin fajtor të të pandehurit Artan Nisllaj për kryerjen e veprës penale të “Mashtrimit” dhe bazuar në nenin 143 paragrafi i parë i Kodit Penal (KP), dënimin e tij me 300.000 (treqind mijë) lekë gjobë”.
Pas këtij vendimi të vitit 2014-të, 41-vjeçari Nisllaj, e ka dërguar çështjen në Gjykatën e Apelit Gjirokastër, ku kjo gjykatë ka dhënë një dënim më të lartë. I gjendur në situatën ku “pas shiut bie në breshër”, ish-drejtori i “Emporiki Bank”, duke mos pranuar vendimin e Gjykatës së Apelit, e ka çuar çështjen në Gjykatën e Lartë, ku Kolegji Penal i kësaj gjykate nuk e ka pranuar rekursin etij.
Vendimi i Gjykatës së Apelit:
Me vendimin nr.20-2015-127/42, datë 19.02.2015, Gjykata e Apelit Gjirokastër, ka vendosur: “Ndryshimin e vendimit nr.54/21-2014-204, datë 27.02.2014 të Gjykatës së Rrethit Gjirokastër. Deklarimin fajtor të të pandehurit Artan Nisllaj për kryerjen e veprës penale të “Vjedhjes duke shpërdoruar detyrën”, parashikuar nga neni 135 i KP-së dhe dënimin e tij me një vit dhe gjashtë muaj burgim.”
Kolegji Penal në Gjykatën e Lartë; Mospranimi i rekursit
“Kolegji Penal i Gjykatës së Lartë, me vendimin nr.00-2017-197, datë 16.03.2017, ka vendosur mospranimin e rekursit të paraqitur nga kërkuesi kundër vendimit nr.20-2015-127/42, datë 19.02.2015 të Gjykatës së Apelit Gjirokastër me arsyetimin se nuk përmban shkaqe nga ato që parashikon neni 432 i Kodit të Procedurës Penale (KPP)”, thuhet në vendimin e Gjykatës së Lartë.
Pasi ndodhej në këto rrethana, ku mbi supet e tij rëndonte një dënim prej 18-muajsh burg, ish-drejtori i “Emporiki Bank”, Artan Nisllaj, ka bërë dhe betejën e fundit ligjore në vitin 2017.
Nisllaj e ka dërguar çështjen e tij në shkallën më të lartë të sistemit të drejtësisë shqiptare, në Gjykatën Kushtetuese.
Mirëpo kjo gjykatë, duke mos parë cënimin e asnjë standarti në gjykimin e çështjes së Artan Nisllajt, nuk e ka marrë në shqyrtim kërkesën e tij.
“Gjykata nuk konstaton cenim të këtij standardi as nga vendimi i dhënë nga Gjykata e Lartë. Gjykata e Lartë nuk është e detyruar ta kalojë çështjen në seancë ose të pranojë kërkimet e palëve në çdo rast, për rrjedhojë, vetëm fakti i shqyrtimit të rekursit në dhomën e këshillimit nga ana e Gjykatës së Lartë dhe mospranimi i tij për shqyrtim në seancë plenare nuk mjaftojnë për të arritur në përfundimin se procesi i zhvilluar në atë gjykatë është jo i rregullt nga pikëpamja kushtetuese”, thuhet në një nga arsyetimet e Gjykatës Kushtetuese, me vendim nr. 199 të datës 20.09.2017./GazetaReforma.com/
