Kryeministri i Kosovës, Avdullah Hoti i ka rezervuar kryeopozitarit të Shqipërisë, Lulzim Basha, një pritje të ngjashme me postin e kryeministrit, të cilin demokrati do të përpiqet sërish ta fitojë në zgjedhjet e vitit 2021.
Hoti dhe Basha ka dalë në një konferencë të përbashkët për mediat pas përfundimit të takimit, ku kanë prekur disa tema, përfshirë koronavirusin, marrëveshjen me Serbinë dhe bashkëpunimin ekonomik midis Kosovës dhe Shqipërisë.
Duke vlerësuar qasjen e Kosovës ndaj pandemisë së COVID-19, Basha tha se Tirana duhet të ndjekë shembullin e palës kosovare për menaxhimin e situatës, për të cilën tha se është kritike. Ndërkohë, Sa i përket marrëveshjes me Serbinë, Basha tha se ajo duhet ketë vetëm një përfundim, njohjen reciproke.
“Ky është qyteti im i dytë pas Tiranës jo vetëm për faktin se kam jetuar këtu, ka qenë shtëpia ime, por edhe pse e bëtë të tillë me vendimmarrjen tuaj për të më shpallur qytetar nderi. Ky është një moment i rëndësishëm dhe me shumë sfida, po ndjekim me shqetësim përparimin e pandemisë COVID. Gjykoj se me paketën ekonomike që ju keni, padiskutim ju vendos në krye të vendeve të rajonit dhe përbën një shembull edhe për Shqipërinë, ku situata është kritike. Dua të ju përgëzoj për nisjen e dialogut dhe t’ju shpreh përkrahjen time në këtë përqasje parimore që ka edhe mund të ketë vetëm një përfundim njohjen reciproke”, tha kreu i Partisë Demokratike.
Basha premtoi se nëse arrin të fitojë zgjedhjet në Shqipëri, një nga vendimet e tij të para si kryeministër do të jetë heqja e taksës në Rrugën e Kombit.
“Ato punë që i kemi nisur, Rruga e Kombit dhe liberalizimi ekonomik, do të vazhdojnë edhe më tej. Një ndër vendimet e para si kryeministër në zgjedhjet e ardhshme do të jetë heqja e taksës dhe traut në Rrugën e Kombit, një vendim i padrejtë. Dua të çmoj lartë qëndrimet tuaja dhe fokusin tuaj në aspektin e bashkëpunimit ekonomik Kosovë – Shqipëri”, u shpreh Basha.
Hoti nga ana e tij bëri me dije se e ka informuar Bashën “me detaje për aktivitetet që po bëjnë ekspertët dhe fatmirësisht ditëve të fundit kemi arritur që situatën me koronavirusin ta sjellim nën kontroll. Gjithashtu edhe për proceset me interes nacional sic është dialogu.”
