Holanda hyri dje në mbrëmje vonë në fazën e saj më të ashpër të kufizimeve anti-COVID deri tani duke vendosur një shtetrrethim për natën në mbarë vendin, në një përpjekje për të kontrolluar shkallën e infeksionit.
Nga dje në mbrëmje, banorët duhet të futen në shtëpi nga ora 21:00 deri në 04:30, kohë gjatë së cilës ata do të ndalohen të lënë shtëpitë e tyre.
Gjithashtu qeveria holandeze ka anuluar të gjitha fluturimet nga Britania dhe Afrika e Jugut për shkak të frikës së përhapjes së variantit të ri COVID.
Qëllimi është të zvogëlohen ndjeshëm infeksionet, ndërsa shqetësimet rriten për mutacionet e virusit. Vendi gjithashtu ka ndaluar fluturimet nga Britania e Madhe, Afrika e Jugut dhe Amerika e Jugut, ku janë identifikuar variante më të transmetueshme të koronavirusit.
Shkelja e shtetrrethimit gjobitet 95 euro. Ky shtetrrethim do të qëndrojë në fuqi deri më 9 shkurt.
Ndërkohë, nga Anglia vijnë lajme shqetësuese: Me gjasë varianti i zbuluar për herë të parë në Britaninë e Madhe, B.1.1.7 është më vdekjeprurës se sa mendohej deri tani.
Kryeministri britanik, Boris Johnson para gazetarëve në selinë qeveritare Downing Street në Londër, është shprehur, se ndërkohë ka “të dhëna” që varianti i ri i virusit Corona nuk është vetëm më infektues, por mund të lidhet edhe me një vdekshmëri më të lartë. Mbingarkesa e madhe e spitaleve në një masë të madhe është e lidhur me variantin e ri të virusit, tha politikani konservator.
Këshilltari shkencor i qeverisë britanike, Patrick Vallance, deklaroi se mes meshkujve të moshës 60-69 vjeç deri më tani ka pasur 10 raste vdekjesh ndër 1000 persona. Me variantin e ri të virusit kjo shifër tani është 13-14 raste. Por kemi ende pak të dhëna të sigurta, për të bërë deklarata me saktësi, tha Vallance. Ekspertët, sipas tij, nuk mendojnë se humbet efekti i imunitetit përmes vaksinës tek variante i ri i virusit. /Gazetareforma.com/
