Pas zbardhjes së dëshmisë së Mark Antony Samson për vrasjen e studentes shqiptare Ilaria Sula, hetuesja e çështjes, Antonella Minunni, ka bërë publike detaje tronditëse mbi sjelljen e tij pas krimit.
Sipas vendimit të gjykatës, ndonëse Samson kishte deklaruar se nuk mund të jetonte pa Ilarian, ai tregoi një nivel të pazakontë vetëkontrolli menjëherë pas krimit.
Edhe pse disa herë kishte thënë se nuk mund të jetonte pa Ilarian dhe nuk mund ta imagjinonte jetën pa të, pasi e vrau brutalisht dhe zhduku trupin e vajzës, ai arriti të kthehej menjëherë në normalitet”, shkruan magjistrati.
Më 25 mars ai e vrau vajzën dhe të nesërmen u kujdes për të zhdukur trupin, për të cilin ende nuk ka një vendndodhje të konfirmuar.
Menjëherë pas kësaj, Samson shkoi për drekë me një nga shoqet e ngushta të Ilarias, duke diskutuar për problemet që kishte me të, sikur ajo të ishte ende gjallë. Sipas hetimeve, ai nuk shfaqi asnjë shenjë pendimi apo shqetësimi gjatë këtij takimi.
Për më tepër, ai i dërgoi mesazhe babait të Ilarias nga telefoni i saj, duke u shtirur se ishte vetë vajza. Po të njëjtën gjë e bëri edhe me shoqet e saj, duke i mbajtur në errësirë për ditë të tëra.
Në përpjekje për t’u shfajësuar, Samson e cilësoi vrasjen si një “akt impulsiv” të shkaktuar nga zemërimi dhe xhelozia, duke pretenduar se ndodhej nën presion për shkak të studimeve.
Por prokuroria thekson se ai veproi me qetësi dhe gjakftohtësi pas ngjarjes, duke manipuluar të afërmit dhe rrethin shoqëror të viktimës.
Gjykata e përshkruan këtë sjellje si një aftësi të frikshme për të fshehur të vërtetën dhe për të kontrolluar emocionet e tij, edhe pas një akti të rëndë si vrasja.
