Hamas ka pranuar një propozim për armëpushim 60-ditor me Izraelin, i cili përfshin lirimin e gjysmës së pengjeve të mbajtura në Gaza dhe lirimin e një grupi të burgosurish palestinezë nga Izraeli, bëri të ditur një burim zyrtar egjiptian të hënën.
Zyrtari i lartë i Hamasit, Basem Naim, konfirmoi miratimin e marrëveshjes duke shkruar në Facebook: “Lëvizja ka dorëzuar miratimin e saj për propozimin e ri të paraqitur nga ndërmjetësit.”
Mediat izraelite raportuan se Izraeli ka marrë përgjigjen e Hamasit, megjithëse nuk ka një reagim zyrtar. Kryeministri Benjamin Netanyahu, në një video nga zyra e tij, tha: “Ashtu si ju, edhe unë dëgjoj raportet në media, dhe prej tyre mund të merret një përshtypje – Hamas është nën një presion të jashtëzakonshëm.”
Sipas burimit egjiptian, marrëveshja parashikon pezullimin e operacioneve ushtarake izraelite për 60 ditë dhe krijon një kornizë për një marrëveshje gjithëpërfshirëse që synon t’i japë fund luftës pothuajse dyvjeçare. Propozimi i ngjan një plani të mëparshëm të paraqitur nga i dërguari i posaçëm amerikan Steve Witkoff, të cilin Izraeli e kishte pranuar.
Të dielën, ndërmjetësit u takuan me përfaqësues të Hamasit në Kajro, ndërsa të hënën në bisedime u bashkua edhe kryeministri i Katarit, Sheikh Mohammed bin Abdulrahman Al Thani, i cili pati takime si me presidentin egjiptian Abdel Fattah al-Sisi, ashtu edhe me përfaqësuesit e Hamasit.
Ndërkohë, planet e Izraelit për të marrë nën kontroll qytetin e Gazës kanë nxitur shqetësim brenda dhe jashtë vendit. Të dielën, dhjetëra mijëra izraelitë zhvilluan disa prej protestave më të mëdha që nga nisja e luftës, duke kërkuar një marrëveshje për t’i dhënë fund luftimeve dhe për të liruar 50 pengjet që ndodhen ende në Gaza që nga sulmi i 7 tetorit 2023. Autoritetet izraelite besojnë se vetëm 20 prej tyre janë gjallë.
Të hënën vonë, dëshmitarët raportuan se tanke izraelite hynë në lagjen Sabra në zemër të qytetit të Gazës, duke numëruar të paktën nëntë tanke dhe buldozerë. Ky veprim u pa si një tregim force, ndonëse fillimi i operacionit ishte lënë i hapur për të lejuar një armëpushim. Netanyahu më parë kishte thënë se operacioni do të niste “shumë shpejt” dhe do të përfundonte me shpartallimin e Hamasit.
Palestinezët largohen nga frika e ofensivës tokësore në Gaza City
Mijëra palestinezë kanë braktisur banesat e tyre në lindje të qytetit të Gazës, duke u zhvendosur në perëndim dhe jug për të shpëtuar nga bombardimet e pandërprera izraelite.
Netanyahu e ka quajtur qytetin e Gazës bastionin e fundit urban të madh të Hamasit, por ushtria ka paralajmëruar se një ofensivë më e gjerë do të rrezikonte pengjet e gjallë dhe do të tërhiqte trupat në një luftë të gjatë guerile.
Dani Miran, babai i një pengu izraelit, tha për Reuters: “Kam frikë se djali im mund të dëmtohet nëse nis ofensiva tokësore.”
Shumë palestinezë në Gaza po kërkojnë gjithashtu fundin e luftës që ka shkatërruar territorin dhe po u bëjnë thirrje Hamasit të intensifikojë negociatat për të shmangur ofensivën. Një inkursion tokësor në qytetin e Gazës mund të zhvendosë qindra mijëra banorë, shumë prej të cilëve janë shpërngulur disa herë që nga fillimi i konfliktit.
Ahmed Mheisen, përgjegjës i një strehimoreje në Beit Lahiya, tha se 995 familje janë larguar në ditët e fundit drejt jugut. “Po shkoj në jug për të lehtësuar gjendjen time mendore,” tha banori i qytetit të Gazës, Mousa Obaid. “Nuk dua të vazhdoj të lëviz pafund. Jeta ka marrë fund, kushtet janë të vështira, çmimet të larta dhe kemi mbi një vit e gjysmë pa punë.”
Bisedimet për armëpushim
Raundi i fundit i bisedimeve të tërthorta për armëpushim dështoi në fund të korrikut, me palët që fajësonin njëra-tjetrën për prishjen e procesit. Izraeli ka kërkuar që të gjithë pengjet të lirohen dhe Hamas të dorëzojë armët, një kërkesë që grupi islamik e ka refuzuar derisa të krijohet një shtet palestinez.
Një zyrtar i Hamasit tha të hënën për Reuters se grupi refuzon kërkesat për çarmatim ose për dëbimin e drejtuesve të tij nga Gaza. Mosmarrëveshje të mëdha mbeten edhe mbi shkallën e tërheqjes izraelite nga Gaza dhe shpërndarjen e ndihmës humanitare, në një kohë kur uria dhe kequshqyerja po përshkallëzohen.
Presidenti amerikan Donald Trump shkroi të hënën në rrjetin e tij social: “Pengjet e mbetura do të kthehen vetëm kur Hamasi të përballet dhe të shkatërrohet!!! Sa më shpejt të ndodhë kjo, aq më shumë shanse suksesi do të ketë.”
Lufta nisi më 7 tetor 2023, kur militantët e Hamasit kaluan kufirin dhe vranë 1,200 persona në jug të Izraelit, duke marrë 251 pengje në Gaza, sipas të dhënave izraelite. Që prej atëherë, mbi 61,000 palestinezë janë vrarë nga sulmet ajrore dhe tokësore izraelite, sipas autoriteteve shëndetësore lokale. Vetëm në 24 orët e fundit, pesë palestinezë kanë vdekur nga uria dhe kequshqyerja, duke e çuar numrin e përgjithshëm të viktimave nga këto shkaqe në 263, përfshirë 112 fëmijë.
