Dy persona janë arrestuar në flagrancë me urdhër të SPAK, pasi dyshohet se kanë ndërhyrë në mënyrë të paautorizuar në sistemin kompjuterik të tre prokurorëve të Posaçëm.
Të ndaluarit, Zambak Gjoni dhe Arnold Rrokaj, akuzohen për ndërhyrje të paautorizuar kompjuterike në kuadër të një grupi të strukturuar kriminal.
Ngjarja u zbulua rreth tre javë më parë, kur specialistët e IT-së në SPAK konstatuan një aktivitet të dyshimtë në e-mailet e prokurorëve dhe ngritën alarmin.
Pas hetimeve intensive nga Byroja Kombëtare e Hetimit, u konfirmua përfshirja e dy personave, të cilët tashmë ndodhen në arrest me burg, me vendim të Gjykatës së Posaçme. Dyshohet se përmes kësaj ndërhyrjeje, janë shpërndarë materiale hetimore të Prokurorisë së Posaçme.
Të arrestuarit kanë shërbyer më parë në institucione të ndryshme, përfshirë Drejtoria e Burgjeve, Inspektorati i Mbrojtjes së Territorit dhe Drejtoria e Hipotekave. Ndërkohë, SPAK po vijon hetimet për të zbuluar nëse pas këtij sulmi qëndron një organizator apo një rrjet më i gjerë.
Pritet një deklaratë zyrtare nga SPAK mbi mënyrën se si ruhen dhe mbrohen të dhënat e ndjeshme të Prokurorisë së Posaçme. Gjithashtu, ky institucion po punon për krijimin e një sistemi të ri të menaxhimit të çështjeve, i cili do të funksionojë përmes një serveri të dedikuar, duke rritur sigurinë kibernetike dhe mbrojtjen e informacionit.
