Arnold Rrokaj ka pranuar gjatë hetimeve se kishte hakuar adresat elektronike të tre prokurorëve të SPAK, duke u justifikuar se veprimin e kishte kryer “nga kurioziteti”.
Ai ka arritur të kopjojë komunikime të ndjeshme që lidhen me tre çështje hetimore.
Megjithatë, hetuesit dyshojnë se deklaratat e tij nuk përputhen me të vërtetën. Nga hetimi ka rezultuar se Rrokaj, ish-punonjës pranë Inspektoratit të Mbrojtjes së Territorit, ia kishte kaluar më tej të dhënat e siguruara Zambak Gjonit, një jurist dhe ish-zyrtar i burgjeve.
Të dy të dyshuarit janë arrestuar dhe ndodhen nën masën e sigurisë “arrest në burg”.
Sulmi kibernetik ndaj adresave zyrtare të SPAK u sinjalizua më 12 mars 2025. Brenda 48 orëve, autoritetet identifikuan dhe ndaluan dy personat e përfshirë.
Gjykata e Posaçme ka urdhëruar mosbërjen publike të përmbajtjes së dosjes, për shkak se hetimet janë ende në zhvillim dhe pista kryesore lidhet me një veprimtari të mundshme të një grupi kriminal.
Sipas një hetimi të brendshëm, nuk është konstatuar ndërhyrje në sistemet digjitale të SPAK, por më shumë duket të jetë shfrytëzuar dobësia e sigurisë në fjalëkalimet personale të prokurorëve. Ndërkohë, është tentuar pa sukses edhe depërtimi në kompjuterin e kreut të SPAK, Altin Dumani.
Çështjen po e heton prokurori Bledar Maksuti, i cili ka kërkuar nga gjykata që të ndalohet publikimi i çdo materiali nga dosja hetimore, për të ruajtur integritetin e hetimit dhe për të mos kompromentuar të dhënat.
