Në skajin jugor të Vlorës, aty ku lumi i egër Vjosë bashkohet me ujërat e detit Adriatik, po zbulon gjithnjë e më shumë një perlë natyrore që po bëhet një nga atraksionet më tërheqëse të këtij sezoni turistik.
Grykëderdhja e Vjosës, me peizazhin e saj të paprekur dhe atmosferën e qetë larg zhurmës së plazheve të mbipopulluara, po shndërrohet në një destinacion të dashur për ata që kërkojnë përvoja ndryshe.
Një nga aktivitetet më të spikatura në këtë zonë është lundrimi me kajak përgjatë rrjedhës së qetë të lumit. Ujërat kristal, gjelbërimi që e rrethon dhe qetësia e natyrës krijojnë një eksperiencë unike për adhuruesit e aventurës dhe relaksit.
Përveç sporteve ujore, zona ofron mundësi kampingu në natyrë të virgjër, net të qeta nën qiellin e hapur dhe mundësinë për të njohur traditat vendase. Një ndër to është peshkimi me çikë, një metodë tradicionale e trashëguar brez pas brezi, që mbetet një pjesë e gjallë e identitetit kulturor të komunitetit lokal.
Rritja e interesit për këtë destinacion ka qenë e ndjeshme gjatë këtij sezoni. Sipas operatorëve turistikë lokalë, kërkesat për rezervime janë rritur ndjeshëm, me vizitorë që vijnë jo vetëm nga Shqipëria, por edhe nga jashtë vendit, në kërkim të një pushimi që ofron më shumë se diell dhe det.
Gryka e Vjosës po kthehet në një nga pikat më të rëndësishme të turizmit alternativ në jug të vendit, duke ofruar aventurë, relaks dhe një lidhje autentike me natyrën shqiptare.
