Zyrtarisht Greqia u zgjerua sot me 12 milje në detin Jon. Por reagimi nga Turqia ka qenë i prerë. Ndërkohë që pala shqiptare vazhdon me përralla dhe bën sehir.
Greqia e ka miratuar ditën e sotme projekt-ligjin në parlament. 284 deputetë votuan pro projekt-ligjit që tashmë i jep Greqisë 13 mijë metra katrorë territor më shumë, ose një zgjerim me rreth 10% të totalit që ka.
Pikërisht zgjerimi i ujërave detare në Jon bashkoi dy partitë më me peshë në Greqi, Demokracinë e Re që përbën mazhorancën dhe Syriza e opozitës drejtuar nga Tsipras.
Ky është vetëm hapi i parë i Greqisë, pasi tashmë mbetet çështja e zgjerimit të ujërave territorialë me Shqipërinë që do të zgjidhet me një dakordësi paraprake për ta çuar çështjen në një Gjykatë Ndërkombëtare.
Ministria e Jashtme turke lëshoi një deklaratë pas shtrirjes së ujërave territoriale greke në 12 milje detare në Detin Jon duke theksuar se “ky veprim përfundon në jug të Peloponezit dhe nuk prek aspak Egjeun”.
Zëdhënësi i Ministrisë së Jashtme turke Hami Aksoy iu referua kundërshtimeve të Ankarasë për zgjerimin e ujërave territoriale në Egje. “Vendi ynë ka të drejta dhe interesa jetësore në Detin Egje.
Ne jemi të vetëdijshëm për pozicionin që ujërat territoriale të këtij deti nuk duhet të zgjerohen në mënyrë të njëanshme. Nuk ka asnjë ndryshim në qëndrimin tonë” theksoi ai.
Deklaratat e përfaqësuesit turk vijnë vetëm disa ditë para rifillimit të kontakteve midis Greqisë dhe Turqisë, të hënën e ardhshme.
Sot kryeministri grek Kyriakos Mitsotakis tha se pas zgjerimit të ujërave territoriale në Jon në 12 milje, vendi mund të bëjë të njëjtën gjë në Kretë dhe gjetkë.
