Një grabitje e dhunshme u regjistrua mbrëmje e djeshme në kryeqytet.
Persona të maskuar, u futën në banesën e Petrit dhe Afërdita Lazes, në zonën e Alliasit në rrugën “Njazi Meka”.
Në momentin e grabitjes, çifti ndodhej në shtëpi.
Ata u përleshën me grabitësit, të cilët i qëlluan me armë zjarri, duke i lënë të plagosur.
Autorët e njihnin mirë banesën dhe ishin ose të afërm, ose punëtorë të tyre.
Policia ndërkohë ka shoqëruar të gjithë punëtorët e dy furrave të bukës që zotëronte çifti, për t’i pyetur se ku ndodheshin në momentin e grabitjes.
“Pjesa e pasme e banesës nga ku çifti hynte në shtëpi ndryshe nga pjesa e përparme ku ndodhej dhe biznesi nuk ka pasur kamera dhe këto të dhëna janë ditur nga autorët, çka sipas policisë, përforcon dyshimet se grabitësit kanë pasur shumë informacion për familjen dhe gjendjen e banesës. Policia ka shoqëruar të gjithë punëtorët dhe po merren në pyetje për të zbuluar se ku ndodheshin ditën e djeshme gjatë kohës së grabitjes”, raporton “News24”.
Një problem që kanë hasur hetuesit ka qenë mjegulla, e cila nuk i ka lejuar të shohin makinën me të cilën janë larguar autorët.
Dëshmitare ka qenë edhe vajza e çiftit, e cila ndodhej në shtëpi në momentin e grabitjes, ndërsa djali kishte dalë me shokët.
Autorët kanë menduar se në banesë nuk ndodhej askush, pasi familja zakonisht lëvizte jashtë kryeqytetit gjatë fundjavave.
