Ditën e sotme një ngjarje e rëndë ka ndodhur në Gjirokastër, ku një efektiv policie është dhunuar barbarisht. Bëhet me dije se efektivi Sokrat Muho, punonjës policie i DVKM Gjirokastër, është goditur me levë në kokë jashtë orarit të punës.
Ndërkohë që për shkak të plagëve të marra e gjendjes së rëndë shëndetësore, Muho është nisur me urgjencë drejt spitalit të Traumës në Tiranë. Ai është sulmuar nga dy persona dhe është lënë i plagosur në rrugë. Kalimtarë të rastësishëm e kanë gjetur dhe e kanë dërguar në spitalin rajonal të Gjirokastrës Deri më tani policia ka identifikuar dhe shpallur në kërkim njërin nga autorët e dyshuar, shtetasi G. Zh.
Vlen të theksojmë se hetimet janë bazuar kryesisht tek një sherr që Muho ka pasur para 3 ditësh me tre persona nga Tepelena. Polici i plagosur ka patur debate me tre bashkëfshatarët e tij nga Progonati dhe sot ata e kanë rrahur në Gjirokastër, raporton Ballkan Web. Gjithashtu thuhet se të tre këta persona kanë qenë nën efektin e alkoolit kur nisi sherri për motive banale.
Duhet përmendur fakti se kohët e fundit, efektivët e policisë kanë qenë të shënjestruar, duke u bërë target për akte dhune dhe jo vetëm. Para 2 muajsh një punonjës i policisë së Qarkullimit Rrugor në kryeqytet është dhunuar me grushte nga një 24-vjeçar.
