Gjykata e Apelit të Tiranës ka ndryshuar masën e sigurisë për dy kontrollorët e Rinasit, Muhin Mezini dhe Armando Fezga. Gjykata ka lënë vetëm masën “detyrim paraqitje”, pasi shkalla e parë i kishte lënë më parë në masën “arrest shtëpie”.
Gjithashtu edhe për kontrolloren Flora Ndreca mbetet në fuqi masa e sigurisë “detyrim paraqitje”. Ata u arrestuan pas ngjarjes së ndodhur në aeroportin e Rinasit, pas grevës ku ata shpallën paaftësinë e përkohshme dhe nuk pranuan të ktheheshin në punë.
“Duke u bazuar në kapitullin e paaftësisë për punë, kërkojmë një periudhë tre ose katër ditor rikuperimi. Arsyet janë: Mungesë gjumi dhe përqendrimi; Stres i akumuluar për shkak të situatës financiare dhe COVID-19; Mos mbulim i paketës shëndetësore as nga sigurimet shoqërore as nga kompania e Spitalit Amerikan”, shkruhej në dokumentin ku ata shpallnin paaftësinë.
Muhin Mezini është supervizor në Shoqërisë “Albcontrol“ sh.a tek Aeroporti “Nënë Tereza“, Armando Fezga është supervizor i trafikut ajror dhe Flora Ndreca kontrollore e trafikut ajror. Ata akuzoheshin si organizatorë të grevës së Rinasit që pezulloi transportin ajror për disa ditë, ata akuzoheshin se kishin shpërdoruar detyrën. Pas grevës, në ambientet e poicisë u shoqëruan edhe më shumë se 20 persona të tjerë, të cilët u lanë të lirë Brenda natës.
