Avokatja Adriana Kalaja depozitoi një kallëzim penal më 2 shtator 2024 pranë Prokurorisë së Posaçme kundër Korrupsionit dhe Krimit të Organizuar.
Kallëzimi, i regjistruar me nr. 1062, përmban akuza për “Falsifikim dokumentesh”, “Shpërdorim detyre”, “Korrupsion pasiv i personave që ushtrojnë funksione publike” dhe “Pastrimi i produkteve penale nga organizata kriminale dhe grup i strukturuar kriminal”.
Në këtë çështje, avokatja pretendon përfshirjen e kryeministrit Edi Rama dhe familjarëve të tij, përfshirë Lindita Ramën, Olsi Ramën, Engjëll Agaçin dhe Artan Lamen, në një proces të parregullt të regjistrimit dhe transferimit të pronës, e cila përfundimisht është përfituar nga shtetasja Lindita Xhillari (Rama).
Gjykata e Shkallës së Parë të Juridiksionit të Përgjithshëm vendosi të mos fillonte hetimet mbi këtë denoncim.
Pas këtij vendimi, Kalaja e paraqiti sërish çështjen në Gjykatën e Shkallës së Parë të Juridiksionit të Përgjithshëm në Tiranë, e cila më 20 shkurt 2025 vendosi të shpallë moskompetencën për trajtimin e kërkesës penale nr. 1937, duke ia kaluar aktet Gjykatës kundër Korrupsionit dhe Krimit të Organizuar, si institucioni kompetent për këtë rast.
Kjo do të thotë që SPAK dhe GJKKO janë tani të detyruara të shqyrtojnë kallëzimin e Kalasë për pronën e Linda Ramës. Megjithatë, mbetet për t’u parë nëse ky proces do të vijojë pa ndërhyrje apo do të ndikohet nga faktorë politikë.
