Ditën e sotme ka qenë edhe gjyqi i Skënder Hoxhës, burrit që vrau bashkëshorten e tij, 53-vjeçaren Antoneta Hoxhaj në orët e para të mëngjesit të 30 prillit në Memaliaj.
Gjykata e Krimeve të Rënda e ka lënë në burg 63- vjeçarin, pasi ky i fundit e ka pranuar edhe para trupit gjykues se e ka vrarë bashkëshorten e tij pasi e tradhtonte me komshiun, S.H.
Sipas Report Tv, 63-vjeçari ka rrëfyer në sallën e gjyqit se pak orë para se të kryente krimin kishte dalë për të pirë një kafe, mirëpo kur është kthyer në shtëpi, ka parë që i dashuri i gruas ka dalë nga dritarja. Mirëpo i akuzuari nga Hoxha si i dashuri, S.H në dëshminë e tij, ka mohuar kategorikisht se ai ka pasur lidhje intime me të ndjerën.
Hoxha në gjykatë duket i lodhur dhe është parë me të njëjtat rroba si në ditën kur kreu vrasjen dhe gjatë fjalës së tij, ai ka thënë se është penduar për vrasjen. Duhet përmendur se asnjë nga familjarët e tij nuk ka qenë i pranishëm në sallën e gjyqit për ta mbështetur edhe pse familjari i tyre, pas ndryshimeve në Kodin Penal, rrezikon burgim të përjetshëm.
