Gjykata e Lartë ka lënë në fuqi masën e sigurisë “arrest në burg” për Safet Bajrin, Behar Bajrin dhe Astmer Bilalin, të cilët akuzohen për vrasjen me paramendim të Fatbardh Licit në vitin 2018 në Shkodër.
Me këtë vendim, instanca më e lartë e drejtësisë shqiptare rrëzoi përfundimisht rekursin e paraqitur nga të pandehurit, duke konfirmuar qëndrimin e Gjykatës së Apelit.
Të tre të akuzuarit kishin kërkuar rishqyrtimin e vendimit të Apelit me pretendimin se u ishte mohuar një proces i rregullt ligjor dhe se mungonin provat konkrete që i lidhnin me krimin.
Sipas avokatëve mbrojtës, procedurat kishin qenë të cunguara dhe vendimi i Apelit ishte i mbështetur në indicie të dobëta. Megjithatë, Gjykata e Lartë nuk konstatoi shkelje që të justifikonin pranimin e rekursit.
Ngjarja për të cilën akuzohen, vrasja e Fatbardh Licit, është konsideruar një prej episodeve më të rënda të gjakmarrjes në Shkodër, me ndikim të gjerë në përplasjet mes grupeve kriminale rivale në veri të vendit. Autoritetet e rendit dhe drejtësisë kanë ndjekur këtë çështje përmes hetimeve të thelluara që zbuluan struktura kriminale të organizuara pas krimit.
Safet Bajri u arrestua në shkurt të këtij viti me urdhër të SPAK, ndërsa gjatë dëshmisë së tij në gjykatë ka mohuar përfshirjen në ngjarje, duke pretenduar se ditën e vrasjes ka qenë në ambiente publike dhe nuk ka lidhje me vrasjen. Pavarësisht kësaj, prokuroria ka paraqitur një sërë provash që e implikojnë atë në krim, përfshirë komunikime dhe dëshmi.
Pak ditë pas arrestimit të Safet Bajrit, në pranga ra edhe e dashura e tij, Eria Ago, e dyshuar për ndihmë në largimin e atentatorëve nga vendi i ngjarjes.
SPAK ka ngritur ndaj të gjithë të përfshirëve akuzat për “vrasje me paramendim” në bashkëpunim, në formën e grupit të strukturuar kriminal, si dhe “kryerje e veprave penale nga organizata kriminale”.
Pavarësisht dështimit në Gjykatën e Lartë, mbrojtja ka deklaruar se nuk do të ndalet dhe synon të ndjekë procedurat në instanca ndërkombëtare, me synimin për të provuar, sipas tyre, pafajësinë e klientëve.
