Gjykata e Posaçme kundër Korrupsionit dhe Krimit të Organizuar ka pranuar kërkesën e SPAK për zgjatjen me tre muaj të masës së sigurisë “arrest në burg” ndaj Laert Haxhiut.
Ai akuzohet si drejtues i një grupi të strukturuar kriminal, përgjegjës për të paktën 13 ngjarje të rënda, përfshirë vrasje, shpërthime me eksploziv dhe grabitje me dhunë.
SPAK argumentoi se nevojiten verifikime shtesë për disa prej episodeve të hetuara, ndërsa pjesëtarët e tjerë të dyshuar të grupit ndodhen në proces gjykimi në Gjykatën e Posaçme.
Vendimi për zgjatjen e paraburgimit deri më 3 tetor 2025 është firmosur nga gjyqtari Erion Bani.
Në të njëjtën seancë, GJKKO zgjati edhe afatin e paraburgimit për Fierdeus Berberin, i arrestuar bashkë me Haxhiun në Greqi në maj të vitit 2023. Për të, paraburgimi do të vijojë deri në muajin nëntor.
Fillimisht, masat e sigurisë ndaj të dyve ishin dhënë nga gjykata e Elbasanit dhe më pas janë konfirmuar nga GJKKO.
Megjithëse aktualisht ndodhet në burg përjetë pas vendimit të Apelit të Posaçëm për ngjarjen e njohur si “masakra e Lushnjës” në vitin 2017, ku mbetën të vrarë Zamir Latifi dhe Jurgen Hoxha, ndërsa u plagosën dy persona të tjerë, autoritetet kanë kërkuar ruajtjen e masës së arrestit për Haxhiun edhe për hetimet e tjera në vijim.
Në atë atentat, që kishte si objektiv Xhulio Shkurtin, nipin e Aldo Bares, u përfshinë dhe Orges Bilbili e Anterio Kaloshi, që gjithashtu vuajnë burgime të përjetshme.
Së fundmi, gjatë një kontrolli në burgun e Drenovës, Haxhiut dhe dy anëtarëve të tjerë të dyshuar të grupit kriminal, iu sekuestruan disa telefona celularë të cilët i kishin në qeli në mënyrë të paligjshme.
Zbulimi çoi në largimin nga detyra të dy zyrtarëve të institucionit penitenciar.
