Një ngjarje e rëndë është shënuar këtë të diel në afërsi të Portit të Shëngjinit, ku një 37-vjeçar është gjetur i pajetë në det.
Sipas informacioneve paraprake nga policia, dyshohet se ai është mbytur, ndërsa pranë vendit ku u gjet trupi i tij, u konstatua edhe një mjet lundrues tip Jet Ski, që mendohet të ketë qenë në përdorim nga viktima para ngjarjes.
Njoftimi:
“Rreth orës 15:40, në afërsi të Portit të Shëngjinit, punonjësit e Policisë Kufitare të portit kanë konstatuar në afërsi të bregut trupin e pa jetë të një shtetasi,. Disa metra larg trupit, shërbimet e Policisë Kufitare kanë konstatuar një mjet lundrues tip Jet Ski.
Nga verifikimet paraprake dyshohet se viktima është shtetasi N. Z., 37 vjeç, banues në Fushë-Krujë.
Në trupin e viktimës nuk janë konstatuar shenja dhune apo dëmtime fizike. Paraprakisht dyshohet se ka humbur jetën si pasojë e mbytjes në det.
Grupi hetimor ndodhet në vendngjarje dhe po punon për sqarimin e rrethanave të ngjarjes”, thuhet në njoftim.
