Policia ka gjetur të djegur plotësisht mjetin që dyshohet se është përdorur nga autorët e atentatit ndaj Gjovalin Prendit, babait të Roan Brahimit, ngjarje që tronditi Lezhën pak ditë më parë.
Automjeti është zbuluar në afërsi të fshatit Fushë Gjorm, rreth 300 metra larg autostradës dhe pranë një kanali ujor. Ekspertët e krimeve kanë nisur ekzaminimin e mjetit të shkrumbuar për të mbledhur çdo provë të mundshme që mund të ndihmojë në identifikimin e autorëve.
Dyshohet se të paktën tre persona kanë qenë të përfshirë në atentatin e ndodhur në zonën e Pllanës, ku Prendi u qëllua për vdekje.
Sipas burimeve hetimore, autorët kanë ndaluar automjetin pranë biznesit të viktimës dhe dy prej tyre, të maskuar, kanë zbritur për të ekzekutuar planin.
Ata kanë hapur zjarr me breshëri armësh sapo kanë parë Gjovalin Prendin pranë derës së lokalit. Plumbat e kanë goditur në pjesën e gjoksit, duke i shkaktuar vdekjen e menjëhershme. Në momentin e ngjarjes, në ambientet e lokalit ndodheshin edhe persona të tjerë, përfshirë familjarë të viktimës, të cilët fatmirësisht nuk kanë pësuar lëndime.
Policia po vijon hetimet intensive për zbardhjen e plotë të ngjarjes dhe identifikimin e autorëve të dyshuar.
