Federata e Sindikatave të Shëndetësisë së Kosovës ka reaguar ditën e sotme në lidhje me tubimet e kohëve të fundit realizuar nga partitë politike për fushatën zgjedhore.
Në reagim thuhet se tubimet e organizuara nuk janë duke respektuar rregullat anti-covid. Në njoftimin e shpërndarë për mediat Federata shprehet se partitë janë duke rrezikuar shëndetin e qytetarëve pavarësisht punës nga stafi mjekësor.
FSShK-ja me shqetësim është duke përcjellë tubimet publike të partive politike në zgjedhjet e parakohshme të cilat nuk i përmbahen masave të përcaktuara me Ligjin për parandalimin dhe luftimin e COVID-19 në territorin e Republikës së Kosovës si dhe rekomandimeve të IKSHPK-së, duke rrezikuar në masë të madhe shëndetin e popullatës në përgjithësi dhe punëtorëve shëndetësor në veçanti sepse studimet e fundit në Britaninë e Madhe kanë treguar se punëtorët shëndetësor janë 4 deri në 5 herë më të ekspozuar(rrezikuar) ndaj infektimit se pjesa tjetër e popullsisë.
Ndërkohë numri i rasteve me koronavriusi është ulur gjatë 24 orëve të fundit në Kosovë. Instituti Kombëtar i Shëndetit Publik ka bërë me dije se janë regjistruar 234 raste të reja pozitive me viursin, nga 2405 testime te kryera, ndërkohë ditën e djeshme kanë qenë 290 të infektuar. Kanë humbur betejën me virusin 2 persona, duke e çuar në 1528 numrin total të vdekjeve që nga fillimi i pandemisë.
