Ndërsa zjarri në landfillin e Elbasanit po digjet për të katërtën ditë radhazi, banorët e qytetit kanë dalë në protestë, të alarmuar nga situata mjedisore që sa vjen e përkeqësohet.
Ata janë mbledhur fillimisht pranë Prokurorisë së Elbasanit, ndërsa më pas pritet të marshojnë drejt Bashkisë, për të kërkuar llogari dhe zgjidhje nga autoritetet vendore.
Vatra e zjarrit, e cila përfshin vendgrumbullimin e mbetjeve pranë inceneratorit të Elbasanit, mbetet aktive, ndërkohë që tymi toksik dhe era e rëndë janë përhapur në zonat përreth, duke e kthyer ndotjen në një emergjencë të vërtetë për shëndetin e qytetarëve.
Një ditë më parë u angazhua edhe ndërhyrja nga ajri, me helikopterë që hodhën ujë mbi zonën e përfshirë nga flakët, por përmasat e zjarrit në shtresat e thella të mbetjeve, të kombinuara me temperaturat e larta dhe erën e fortë, po pengojnë efektivitetin e ndërhyrjes.
Pavarësisht përpjekjeve, flakët nuk janë shuar, edhe pse deri më tani janë hedhur mbi 10.500 metra kub dhe, për të izoluar dhe shuar zjarrin.
Ekspertët shprehen se përmasat e zjarrit brenda shtresave të mbetjeve e bëjnë situatën jashtëzakonisht të vështirë për t’u menaxhuar, duke nxjerrë në pah mangësitë në menaxhimin e fushës së mbetjeve dhe mungesën e një plani emergjence të strukturuar.
Ndërkohë, banorët kërkojnë transparencë, përgjegjësi institucionale dhe masa konkrete për zgjidhjen e situatës.
Protesta e tyre, e organizuar në një prej qyteteve më të ndotura të vendit, është edhe një apel për ndërgjegjësim ndaj krizës mjedisore që po rëndon jetën urbane në Elbasan.
