Europol ka bërë publike detaje të një operacioni ndërkombëtar që çoi në goditjen e asaj që e përshkruan si “karteli i parë shqiptar i narkotrafikut”.
Nga 7 deri më 8 gusht 2025, autoritetet shqiptare, në bashkëpunim me agjencitë ligjzbatuese të Belgjikës, Francës, Gjermanisë, Italisë dhe Holandës, ekzekutuan një sërë bastisjesh të koordinuara, me mbështetjen e Europolit.
Operacioni rezultoi me arrestimin e 10 anëtarëve të dyshuar të një rrjeti të organizuar kriminal të përfshirë në trafikim shumëtonësh të kokainës dhe pastrim parash.
Sipas Europolit, ky rrjet kishte lidhje me organizata të tjera poli-kriminale me rrezik të lartë, aktive në të gjithë Bashkimin Europian dhe më gjerë.
Aksioni pasoi arrestimin, në fund të qershorit, të një figure kyçe të grupit në Shqipëri, i cili kërkohej nga drejtësia shqiptare për ekzekutimin e një dënimi 21-vjeçar nga gjykatat italiane për akuza të rënda, përfshirë vrasje, rrëmbim, fshehje kufome, kërcënime, posedim të paligjshëm të armëve dhe pengim të drejtësisë.
Gjatë dy ditëve të operacionit u ekzekutuan 15 urdhër-bastisje, duke çuar në:
• Arrestimin e 10 personave
• Sekuestrimin e një resorti turistik, vilash, apartamenteve, parcelave toke, automjeteve dhe aksioneve në kompani me vlerë prej disa milionë eurosh
• Sekuestrimin e 111,800 eurove, 4,000 dollarëve amerikanë (rreth 3,434 euro) dhe 880,000 lekëve shqiptarë (rreth 9,048 euro) në para të gatshme
Hetimet, të bazuara në analizën e komunikimeve të koduara të platformës Sky ECC, edhe pse kjo ishte çaktivizuar mbi katër vite më parë, zbuluan episode kriminale që përfshinin trafikimin e sasive të mëdha të kokainës nga Amerika Latine drejt porteve kryesore të BE-së, përfshirë Hamburgun dhe Roterdamin.
Vetëm në një nga këto dërgesa, udhëheqësi i grupit kishte përfituar mbi 40 milionë dollarë nga pjesa e tij.
Ky drejtues kriminal organizonte dhe financonte transportet duke përdorur kanale të koduara komunikimi, shpesh edhe nga vende të largëta. Fitimet masive i investonte në pasuri të paluajtshme dhe biznese në Shqipëri dhe në vende të tjera evropiane.
Europol ofroi ekspertizë të gjerë për strukturën e rrjetit, metodat e trafikimit dhe pastrimit të parave, duke shpërndarë raporte inteligjence tek partnerët dhe duke organizuar takime operative për koordinim. Në ditën e aksionit, një ekspert i Europolit për krimin e organizuar ishte i pranishëm në Tiranë me një zyrë të lëvizshme, duke lehtësuar shkëmbimin e informacionit ndërkombëtar.
Operacioni u realizua me pjesëmarrjen:
• Shqipëria: SPAK, Byroja Kombëtare e Hetimit, Policia e Shtetit
• Belgjika: Policia Gjyqësore Federale
• Franca: Policia Kombëtare
• Gjermania: Zyra Federale e Policisë Kriminale dhe Zyra e Policisë Kriminale Shtetërore Baden-Württemberg
• Holanda: Policia
• Italia: Policia e Shtetit dhe Shërbimi i Bashkëpunimit Ndërkombëtar të Policisë
Operacioni ishte pjesë e EMPACT, platformës evropiane multidisiplinare që adreson kërcënimet më të mëdha nga krimi i organizuar dhe serioz ndërkombëtar, duke forcuar bashkëpunimin strategjik dhe operacional mes autoriteteve kombëtare, institucioneve të BE-së dhe partnerëve ndërkombëtarë.
