Gjashtë muaj pas arrestimit të kryebashkiakut të Tiranës, Erion Veliaj, në zyrën e tij të punës me urdhër të SPAK, ai u njoh sot me akuzat në paraburgimin e Durrësit, ku iu komunikuan zyrtarisht nga agjentët e BKH-së.
Në këtë dosje, Prokuroria e Posaçme Kundër Korrupsionit dhe Krimit të Organizuar ka marrë të pandehur 30 persona dhe disa shoqëri tregtare, të përfshirë në një skemë të organizuar korrupsioni dhe pastrimi parash, që kishte për qëllim përfitime personale nga fondet publike të Bashkisë Tiranë.
Kryebashkiaku Veliaj akuzohet për korrupsion pasiv në funksion të lartë shtetëror në tetë raste, pastrim parash dhe fshehje ose deklarim të rremë të pasurive dhe interesave private. Ai dyshohet se së bashku me bashkëshorten, Ajola Xoxa, ka krijuar dhe vënë në funksionim një mekanizëm që përfiton në mënyrë të paligjshme fonde publike për pasurimin e tyre personal dhe familjar përmes veprimeve të fshehta dhe të kundërligjshme. Veliaj është arrestuar më 10 shkurt dhe ndodhet në paraburgim, ku ka pranuar komunikimin e akuzave pa kundërshtime në praninë e avokatëve të tij.
Ajola Xoxa, bashkëshortja e tij, akuzohet për të njëjtat vepra penale, përfshirë korrupsion pasiv, pastrim parash dhe fshehje pasurie. Fillimisht ndaj saj ishte caktuar masa “arrest në shtëpi”, por më pas gjykata e ka lehtësuar në “detyrim paraqitje”.
Në dosje janë përfshirë gjithashtu biznesmenë të ndryshëm, mes tyre Elman Abule, i cili u mor i pandehur për pastrim parash, si dhe Mirton Lika, emër i ri në hetim, i cili po hetohet për fshehje të të ardhurave.
Një tjetër person kyç është Gentian Sula, pronar i kompanisë së ndërtimit ‘Agi Kons’, i lidhur me Veliajn që nga koha kur ky i fundit ishte Ministër i Punës. Sipas SPAK, Veliaj ka blerë banesë në një kompleks rezidencial në pronësi të Sulës, ndërsa bashkëshortja e biznesmenit u emërua zv/ministre në ministrinë e Veliajt. Kompania ‘Agi Kons’ ka fituar tenderë të shumtë publikë nga Bashkia Tiranë gjatë periudhës kur Veliaj ishte kryebashkiak, ndërsa Veliaj zotëron tre vila në zonën rezidenciale Qerret në Kavajë, të ndërtuara nga kompania e Sulës, si shpërblim për marrëdhënien klienteliste.
Në këtë dosje janë marrë të pandehur edhe Sokol Kryeziu, Fatmir Bektashi, Meriman Palushi, Shkëlqim Fusha dhe Frosina Bollo, të cilët dyshohen për përfshirje në skemën e korrupsionit dhe përfitimeve të paligjshme nga fondet publike. Janë përfshirë edhe ish-vartës të Ajola Xoxës si Ina Goxhaj, Adela Kondakçiu dhe Flutur Xhani, si dhe Erald Simixhiu, daja i Ajola Xoxës, të cilët dyshohen për veprime që pengojnë zbardhjen e së vërtetës dhe bashkëpunim në abuzime me fondet.
Një akuzë e veçantë rëndon mbi ish-deputeten socialiste Klotilda Bushka, e cila akuzohet për veprime që pengojnë zbardhjen e së vërtetës. SPAK e akuzon për ushtrim presioni dhe kërcënimi ndaj Ina Goxhajt, me qëllim që ajo të mos dëshmonte kundër çiftit Veliaj-Xoxa. Bushka ka mohuar akuzat, duke deklaruar se ka këshilluar Ina Goxhajn të tregojë të vërtetën, por gjatë hetimeve është publikuar edhe një fotografi ku ajo shfaqet duke takuar avokatin e Ajola Xoxës.
Në mesin e të pandehurve është edhe Fatjon Baçi, polici i burgjeve, i cili dyshohet se i ka dhënë kryebashkiakut celularin për të komunikuar gjatë shoqërimit nga paraburgimi në Gjykatën e Posaçme të Apelit. Baçi ka marrë njoftimin për akuzë për futjen e sendeve të paligjshme në ambiente të burgut, ndërsa Veliaj dyshohet se ka kërkuar ndërhyrje për lirimin e tij dhe kandidimin për deputet, duke përmendur raste të tjera të kryebashkiakëve që kanë shpëtuar burgun.
Prokuroria e Posaçme ka njoftuar se hetimet lidhur me këtë dosje pritet të përfundojnë më 29 shtator.
