Ditën e sotme ka shkuar në 609 numri i të prekurve nga COVID-19 në vendin tonë, pasi nga testimet e kryera gjatë 24 orëve të fundit janë shënuar 25 raste të reja.
Rastet e reja janë shënuar 17 në Krujë dhe 8 në Kurbin, teksa për herë të parë në Tiranë që nga nisja e epidemisë nuk ka asnjë të prekur.
Nga ana tjetër, numri i të shëruarve ka shkuar në 345, ku gjatë 24 orëve të fundit janë shëruar edhe 18 pacientë të tjerë.
Mirëpo, teksa mjekët u shprehën se kurba do shkonte drejt rënies, gjatë javës që lamë pas u vu re se ajo ishte e paqëndrushme, duke shkuar herë në tred rritës e herë në trend zbritës.
Këtë trend të virusit në vendin tonë e ka komentuar së fundmi epidemiologu italian Giulio Tarro.
Në një lidhje me Skype për “Tempora” epidemiologu shpjegoi ecurinë e kurbës së infektimit në Shqipëri, duke thënë se infektimi mund të jetë përcjellë në formë zinxhiri, çka ka sjellë formën e saj.
“ Duhet të shikojmë kohën dhe numrin e të prekurve. Për kurbën në formën M të Shqipërisë, duhet pasur parasysh se ka pasur një infektim fillestar, ndoshta ka qenë edhe mundësia që ky infektim të jetë përcjellë në formë zinxhiri nga një moment në tjetrin, dhe pasi ka përfunduar, ka nisur një zinxhir tjetër, çka ka sjellë formën e kësaj kurbe.”
Sakaq, italiani ka shtuar se nuk ka nevojë për masa kaq të rrepta dhe se situata mund të përballohet shumë mirë edhe vetëm duke respektuar rregullat e pandemisë.
“Kjo pjesa e dytë e M-së ndodhet në kushte klimaterike të ndryshme, që janë të njëjta me ato që janë në jugun e Italisë. Prandaj do të jenë të nevojshme maskat dhe dorezat, dhe kjo duhet bërë në liri totale, pasi nuk është e nevojshme që të ketë masa kaq shtrënguese. “
