Enkileda Çarja ka shkruar historinë në Kampionatin Botëror të Peshëngritjes për grupmoshat U-17 dhe U-20 që po zhvillohet në Lima të Perusë. Shtangistja e talentuar shqiptare, vetëm 17 vjeçe, është shpallur kampione e trefishtë bote për moshën nën 17 vjeç, duke dominuar kategorinë e peshave deri në 64 kilogramë.
Çarja tregoi një performancë mbresëlënëse në të dy stilet e garës, duke realizuar me sukses të gjitha gjashtë provat e saj. Në stilin e shkëputjes, ajo ngriti fillimisht 94 kg, më pas 97 kg dhe në fund 98 kg, duke siguruar medaljen e parë të artë. Në stilin e shtytjes, Enkileda vazhdoi me të njëjtin ritëm fitues, duke ngritur 110, 113 dhe 115 kilogramë, duke shtuar edhe dy medalje ari të tjera në koleksionin e saj.
Me një total prej 213 kilogramësh, ajo u shpall gjithashtu kampione bote në dygarësh, duke u konfirmuar si një prej sportisteve më të suksesshme në historinë e këtij kampionati për moshat e reja. Rezultatet e saj u shoqëruan edhe me një tjetër arritje madhështore: vendosjen e tre rekordeve të reja europiane për moshën U-17 – 98 kg në shkëputje, 115 kg në shtytje dhe 213 kg në total.
Por sukseset nuk përfundojnë këtu. Rezultati i saj në stilin e shkëputjes i siguroi Enkiledës edhe një medalje bronzi botërore në kategorinë për moshat U-20, duke i shtuar edhe më shumë vlerë paraqitjes së saj në Lima.
Ekipi që qëndron pas këtij suksesi është po aq i rëndësishëm. Enkileda Çarja, e cila garon për Teutën, udhëhiqet nga trajnerja Eglantina Kalemi. Pas përfundimit të garës, Kalemi nuk i fshehu emocionet, duke u shprehur:
“E kemi pritur këtë ditë. Përgatitjet na shkuan mirë dhe Enkileda tani është një peshëngritëse me kohë të plotë. Kampionia e parë botërore e Shqipërisë dhe tre rekorde evropiane, kjo është shumë mbresëlënëse.”
Ky sukses shënon arritjen e parë historike për Shqipërinë në këtë kategori dhe një tjetër dëshmi se sporti shqiptar, me talentin dhe përkushtimin e të rinjve si Enkileda, mund të arrijë majat në arenën ndërkombëtare.
