Policia e Tiranës ka përfunduar hetimet mbi një përplasje të dhunshme që ndodhi mbrëmjen e kaluar në një lokal në rrugën “Sami Frashëri”, ku një 40-vjeçar u sulmua me qytën e një arme zjarri dhe u plagos lehtë.
Ngjarja u përshkallëzua pas një konflikti mes disa personave për motive të dobëta. Si rezultat, 8 shtetas janë arrestuar, ndërsa një tjetër është shpallur në kërkim.
Sipas hetimeve, Adrian Shabanaj, 51 vjeç, banues në Fier, dyshohet se gjatë përleshjes ka goditur me qytën e armës shtetasin Kasem Stani (Pasha), 40 vjeç, dhe më pas ka qëlluar një herë me armë zjarri.
Për fat, plumbi nuk ka prekur asnjë person, ndërsa Shabanaj është larguar nga vendngjarja dhe aktualisht ndodhet në kërkim nga policia.
Ndërkaq, janë ndaluar dhe proceduar penalisht 8 persona të përfshirë në konfliktin fizik:
• Kasem Stani (Pasha), 40 vjeç
• Elton Ajredinaj, 43 vjeç
• Emiljan Ruko, 39 vjeç
• Bjorni Tahiraj, 24 vjeç
• Eriald Tahiraj, 35 vjeç
• Denikiajder Tahiraj, 30 vjeç
• Eduart Sulaj, 47 vjeç
• Kastriot Stani, 53 vjeç
Të gjithë janë akuzuar për veprën penale “Moskallëzim krimi”.
Në vendngjarje, policia ka sekuestruar armën e përdorur në konflikt, një pistoletë, si dhe celularë e prova të tjera që do t’i shërbejnë hetimit të mëtejshëm.
Policia vijon operacionin për lokalizimin dhe kapjen e Adrian Shabanajt, ndërsa materialet procedurale janë dorëzuar pranë Prokurorisë së Tiranës për veprime të mëtejshme.
