Policia e Tiranës, pas një hetimi të koordinuar me specialistë për hetimin e krimeve, ka arrestuar dy persona, si autorë të dyshuar të vrasjes së Abdulla Budllës.
Në prangat e policisë kanë përfunduar vëllëzërit Arsil e Sajmir Sherra, 20 dhe 32 vjeç. Uniformat blu të kryeqytetit informojnë se është sekuestruar automjeti që është përdorur për të kryer krimin.
Vrasja e Budllës dyshohet se ka ndodhur për motive të dobëta. Arrestimi i vëllezërve Sherra, vjen pasi uniformat blu zhvilluan dje një operacion të gjerë, të përqëndruar në zonën e Rinasit dhe të Niklës.
Dje në mbrëmje, policia ka shoqëruar në komisariat disa persona, të dyshuar si ekzekutues të 71-vjeçarit. Ooperacioni u zhvillua në Fushë-Krujë, pas informacioneve se Budlla kishte pasur disa mos-marrëveshje me persona në këtë zonë.
Pasditen e tri ditëve më parë, Abdulla Budlla, 71 vjeç me profesion taksist është gjetur i vrarë jashtë makinës së tij në Fushë Prezë. Në vendngjarje nuk u gjet asnjë gëzhojë, edhe pse ndaj tij ishte shtënë disa herë.
Policia dhe dëshmitarët kanë thënë se Budlla nuk njihej si person problematik, ndërsa nuk kishte pasur asnjë precedent kriminal.
