Gjykata e Tiranës ka shtyrë për në datën 30 dhjetor pretencën ndaj Arben Grorit, i cili akuzohet për vrasjen e të ashtuquajturit “i forti i Tiranës”, Naim Zyberi (në foto).
Shkak për shtyrjen është bërë mungesa e avokatit mbrojtës gjatë seancës së sotme.
Prokurori i çështjes Artan Lulaj, ishte bërë gati për të dhënë konkluzionet përfundimtare, shkruan “Shqiptarja.com”.
Pritet që më 30 dhjetor, prokurori i çështjes të kërkojë njohjen e vendimit me burgim të përjetshëm, të dhënë nga drejtësia italiane për Grorin.
Ky i fundit arriti që të hapte procesin gjyqësor, pasi gjyqtarët Fatmira Hajdari dhe Alaudin Malaj, pranuan kërkesën e tij, për shqyrtimin e dosjes së vrasjes së Naim Zyberit në Itali.
Vendimi i Apelit të Tiranës ka ngjallur shpresat e Grorit, pasi shoku i tij, Gert Gjinarari u la në liri me kusht në shkurt të 2019-ës nga Gjykata e Korçës.
Grori ka 18 vite që qëndron pas hekurave të burgjeve të sigurisë së lartë.
Nëse Gjykata e Tiranës e dënon Grorin me 25 vite burg, atëherë ai do të lirohet menjëherë, pasi dënimin e ka kryer.
Arben Grori është vëllai i Artur Grorit, pronarit të kompleksit “Artur” në Mullet të Tiranës, i vrarë vite më parë nga i forti i Tiranës, Naim Zyberi.
