Për nëntë muaj ekonomia e vendit u rrit me 4,35 për qind, ndërsa rritja ekonomike për 3-mujorin e tretë vlerësohet prej 4,48 për qind. Shifrat e rritjes ekonomike u bënë publike dje nga Instituti i Statistikave.
Drejtoresha e Institutit të Statistikave, Delina Ibrahimaj, tha dje se kontributin kryesor për rritjen ekonomike e dha sektori i energjisë, transportit dhe turizmi. Më herët Banka e Shqipërisë paralajmëroi rënie të lehtë të ekonomisë për 3-mujorin e katërt, kjo për shkak të rënies së prodhimit të energjisë.
Produkti i Brendshëm Bruto në tremujorin e tretë të vitit 2018 vlerësohet me rritje prej 4,48 për qind, kundrejt tremujorit të tretë të vitit 2017. Kontributin kryesor në këtë rritje e kanë dhënë degët si industria, energjia dhe uji me 1,71 për qind, tregti, transport, akomodim dhe shërbim ushqimor me 1,12 për qind, ndërtimi me 0,48 për qind, aktivitete profesionale dhe shërbime administrative me 0,35 për qind, bujqësia, pyjet dhe peshkimi me 0,28 për qind, administrata publike, arsimi dhe shëndetësia me 0,12 për qind, aktivitete të pasurive të paluajtshme me 0,09 për qind, aktivitete financiare dhe të sigurimit me 0,07 për qind dhe arte, argëtim dhe çlodhje, aktivitete të tjera shërbimi me +0,02 për qind.
Negativisht kontribuoi aktiviteti i informacionit dhe komunikacionit me -0,18 për qind. Taksat neto mbi produktet kontribuuan pozitivisht me 0,4 për qind”, u shpreh kreu i INSTAT-it. Vlerësimi paraprak i PBB-së për nëntëmujorin, i mbështetur në vlerësimet tremujore, pati rritje prej 4,35 për qind krahasuar me të njëjtën periudhë të vitit 2017. Referuar shifrave të Institutit të Statistikave, degët kryesore të ekonomisë për tremujorin e tretë të vitit 2018, krahasuar me tremujorin e tretë të vitit 2017 shfaqen me rritje. Sektori i bujqësisë pati një rritje me 1,48 për qind.
Aktiviteti i industrisë, energjisë dhe ujit pati rritje me 15,4 për qind, ku ndikimin kryesor në këtë rritje e kanë dhënë industria përpunuese dhe energjia elektrike, të cilat u rritën përkatësisht me 4,52 për qind dhe 79,12 qind. Sipas shifrave zyrtare të INSTAT-it, energjia ka dhënë ndikim të madh dhe në rritjen reale të Prodhimit të Brendshëm Bruto me 1,32 për qind. Aktiviteti i ndërtimit pati rritje me 5,42 për qind.
